2020թ. օգոստոսի 5-ին իրավապաշտպան կազմակերպությունը տարածել է հայտարարություն, որով դատապարտում է ադրբեջանական կառավարությանը «քաղաքական ընդդիմությանը, կարծիքների արտահայտման ազատությունը և խաղաղ հավաքների ու միությունների ազատությունը դաժանորեն ճնշելու» համար:
«Ձերբակալությունների և ահաբեկումների վերջին ալիքը կարող է հանգեցնել առանց այդ էլ մասնատված ընդդիմության ոչնչացմանը»: Հայտարարության մեջ նշվում է, որ ավելի քան 100 մարդ, հատկապես ընդդիմադիր ակտիվիստներ և նրանց համակիրներ, հուլիսի 14-15-ը Բաքվի կենտրոնում հանրահավաքից հետո ձերբակալվել են քաղաքական դրդապատճառներով:
Դրանից հետո Իլհամ Ալիեւն ընդդիմությանը բացահայտ մեղադրեց բռնության մեջ և սպառնաց երկիրն ազատել «5-րդ շարասյունից» և «թշնամիներից», որոնք «հայերից ավելի վատն են»:
«Ադրբեջանի կառավարությունը պետք է վերջ տա քաղաքական հետապնդումներին, քաղաքական ընդդիմախոսների ու նրանց կողմնակիցների ահաբեկումներին և նրանց դեմ բռնաճնշումներին: Բոլոր այն անձինք, որոնք կամայականորեն ձերբակալվել են քրեական և վարչական կարգով, պետք է անմիջապես և անվերապահորեն ազատ արձակվեն»,-նշվում է Amnesty International-ի հայտարարության մեջ:
Հուլիսի 14-15-ի հանրահավաքի ընթացքում ձերբակալված 70 մարդկանցից բացի, Ադրբեջանի իշխանությունները ձերբակալել են ընդդիմության մեծ թվով ակտիվիստների և առաջնորդների: Ավելի քան 60 մարդ ձերբակալվել է տարբեր մեղադրանքներով՝ հասարակական կարգի խախտումներից մինչև ոստիկանությանը դիմադրություն ցույց տալը: Կազմակերպությունը փաստում է, որ ձերբակալությունները հատուկ ուղղված էին Ժողովրդական ճակատ կուսակցության անդամների դեմ, այդ թվում կուսակցության 4 առաջնորդների՝ Ասիֆ Յուսուֆլիի, Բախտիյար Իմանովի, Ֆուադ Ղահրամանլիի և Մամեդ Իբրահիմի դեմ (իրականում կուսակցության 5 առաջնորդների. փաստաթղթում չի հիշատակվում Այազ Մագերամլիի անունը, ծնթ.՝ Է.Ա.):
«Նրանք բոլորը կարող են դատապարտվել երկարաժամկետ ազատազրկման՝ իշխանությունը բռնի ուժով գրավելու և խռովություններ կազմակերպելու փորձի շինծու մեղադրանքով: Նրանց չի թույլատրվում հանդիպել փաստաբանների հետ և, ըստ ոչ պաշտոնական տեղեկությունների, նրանց խոշտանգում են», – ասվում է Amnesty International-ի հայտարարության մեջ:
