2014 թվականին ծագումով քոլատակցի, ռուսաստանցի գործարար Հայկ Մաղաքելյանի ֆինանսավորմամբ, Քոլատակում սկսվել էր կառուցվել նոր թաղամաս, որը նախատեսված էր պաշտպանության բանակի սպաների համար: Առաջին փուլում պետք է կառուցվեր երեք սենյականոց 22 տուն, յուրաքանչյուրը 20 մլն դրամ արժողությամբ: Այնուհետև տների թիվը պետք է հասցվեր 50-ի: Հայկ Մաղաքելյանի ջանքերով է ասֆալտապատվել նաև Հյուսիս-հարավ մայրուղուց Քոլատակ տանող ճանապարհը: Հետագայում բարերարի ֆինանսական վիճակի վատթարացմամբ պայմանավորված շինանարարական աշխատանքները դադարեցվեցին, և մինչ օրս սպաների տները պատրաստ չեն:
ԱՀ քաղաքաշինության նախարար Արամ Սարգսյանն artsakhnow.am-ին տեղեկացրեց, որ ԱՀ կառավարության ֆինանսավորմամբ շինարարական աշխատանքները վերսկսվել են և ընթացիկ տարում տներն ավարտին կհասցվեն ու կհանձնվեն իրենց շահառուներին:
Քոլատակի համայնքապետ Սեյրան Ավանեսյանն էլ հայտնում է, որ թաղամասի ենթակառուցվածքներն արդեն պատրաստ են՝ լուծվել են ջրի և էլեկտրականության հարցերը, շինարարներն աշխատում են թաղամասում, և մոտ ապագայում տները բերվելու են վերջնական տեսքի: