78-ші Қара пайым-сөз: Абай болыңыз, қуысқа тығып тастаған Құдайдың кітабы Құранды оқыңыз!

Әңгіме – әңгімемен, өмір – өрнегімен білінбей өте береді. Бірақ, айналайын қазағым, ІІІ дүниежүзілік соғыстың басталғанына 7-8 айдан асты. Сенбесеңіз кеше (31 шілде 2020 жылы) бір күнде әлемде 292,5 мың адам «Тәжі-дерт»* індетін жұқтырып рекорд жасап, дімкәстар саны 17,1 млн. адамға жетті. 668910 адам (кеше 6812 адам), соның ішінде АҚШ-та 4,5 млн. адамға індет жұғып, 152 000 мың адам қайтыс болды. Мұны сұрапыл соғыс демегенде не дейсің. Қазекем де қырылып жатыр, сол себепті «абайлаңдар, сақ болыңдар» деп жай айту жаттанды жауыр сөзге айналды. Егер қазақтың қабырғасын тағы бір адамға сөкпеймін десең, барлық күйкі тіршілікті жиып қойып, үйіңде жер бауырлап жат, амал жоқтықтан көшеге шықсаң, аузы-мұрныңды түгел тұмшалап бетперде ки. Қазіргі кездегі «алақай, алақай, 100 пайыз иммунитетке кепілдік беретін вакцина табылды, індеттің жойылуы енді уақыттың ісі!» деген жарнамалық даурықпа хабарламаларға сеніп арандап қалмаңыздар. Бұл індет, қатер-қаупі санитарлық инфекциядан да асып түсетін рухани азғындықтан туындаған індет сияқты. Сол себепті оның емі жуық арада табыла қоятынына сенгім келсе де, сене алмай жүрмін. Рухани дүниеңізді түгендеңіз, не істеп жүрмін деп ойланыңыз, шкафтың қуысына тығып тастаған Құдайдың кітабы Құранды оқыңыз, әзірге бұл індеттің жалғыз емі осы деп түсініңіз.

* Короновирус-COVID-19 сияқты жаман ауруларды қазақ «құтырып кетеді» деп атын атауға тыйым (ғылыми тілде – «табу») салғасын, оны «Тәжі-дерт» деп жазып жүрмін.