81-ші Қара пайым-сөз: Біріңді қазақ, бірің дос, көрмесең істің бәрі бос – деп Абай атамыз нені айтқан...

Қанша жазба жазсаң да, әсіресе қысқа етіп жазғанда, айтатын ойыңа жете алмай, жазған сайын «жазбағың» алыстан бұлдыраған елес сияқты діңкеңді құртады. Сол себепті кейде қайдан шықсаң одан шық деп зеңбіректің снарядындай дәл төбеден түсіп бастауға тура келеді. Қазір дәл сол жағдайда отырмын. Біздің қазекең кейде біреулердің айтағына еріп, өзі болса да оқымай, біреудің пікіріне шынжырланып, өз пікірін «тәрк» етіп, ит сияқты әлгілердің айтақтаған жағына қарай «әупілдеп» үріп жүреді. Не туралы меңзеп отырғанымды түсінген шығарсыздар деп ойлаймын. Атамыз қазақ «өнерді үйрен де жирен» дейді. Мысалы, осында әр сөзімді бағып, қит етсем «арабқұл» деп айғайлап-атойлап шыға келетін бірнеше бауырым отыр. Олар адасқан болса да, олар менің бауырларым, түсінесіздер ме, олар менің бауырларым. Абайдың «Біріңді қазақ, бірің дос, көрмесең істің бәрі бос» деген өлең жолы мен үшін бұлжымас бұйрық. Олар менің қазағым, қаным және қонағым, сондықтан оларды «кет» деп қуып, аты-жөндерін жалпы тізімнен өшіре алмаймын. Мысалы, Ислам дінін алайық. Дүмше молдалардың, мемлекеттің солақай саясатының салдарынан қазақтар Ислам дінінің маңызы мен мақсатын түсіне алмай отыр: https://en.wikipedia.org/wiki/Islam. Ислам біз ойлағандай адамзаттың бәрін фанатик, террорист қылып, намазға жығып тастауды ғана көздемейді. Оның асыл идеалы – обал мен сауапты, жақсы мен жаманды, арам мен адалды т.б. ажырата алатын жағдайда бол, хайуан емес адам бол дейді. Бар болғаны сол. Осы идеяны тарқату үшін миллиондаған адамдар өмірін құрбан етті және құрбан етіп те жатыр. Ислам діні адамзат баласы моральдық қағидаттардың шыңына шығуы үшін өз ұстанымдарын жік-жікке бөліп қарапайым түсіндіреді. Біреу білетін, білсе де мағынасын түсінбейтін бес парыздан (Иман, Намаз, Ораза, Зекет, Қажылық), уәжіп амалдар, сүннет амалдар және т.б. тарайды. Қазақтың Ұлттық идеологиясын жасау және қазақты бақытты ету ниеті мемлекеттің миының бір бұрышында расында да жатқан болса, жаңадан «велосипед» ойластырып әуре болмай, ұлттық идеологиямызды осы Ислам қағидаттарының негізінде құрастыруымыз керек. Ал оны қалай құрастыру керектігі Қалдархан деген қазақтың миының бір бұрышында уақытын күтіп жатыр...