61-ші Қара пайым-сөз: Халықты «маска тағуға үйрету» үлкен мәселеге айналып барады...

Өмір, тіршілік болғасын, сапырылысып, ығы-жығы иық тіресіп, кейде «тар жерге тамаша болдың» деп бір-бірімізге қабақ шытып, тіпті төбелесіп жатамыз. Әсіресе мына карантиннің кезінде «маска киіп жүр» деген сөз, «өгіздердің көзіне қызыл шүберек желбіретіп, жынын қоздыратын» сияқты әсер ететін болды. Өткенде мәдениетті ел деген Германияда «жолаушылар, автобусқа маска киіп кіріңдер» деген көлік жүргізушісін, атпалдай төрт жігіт тепкілеп өлтіріп тастады. Алматыда әзірге мұндай орынды талаптар айқай-шумен аяқталып жүр. Бірақ бұл карантин құрғыр осылай созыла берсе, «маскаға қатысты» бізде де қан төгілетін түрі бар. Сол үшін ТВ-да, әлеуметтік желілерде «маска тағудың пайдасы туралы» әзіл-шыны аралас әлеуметтік-қоғамдық маңызы зор қысқа бейне-клиптерді тоғытып, ондап-жүздеп беретін уақыт туды. Бұл мәселеге бей-жай қарауға болмайды, халық бала сияқты ғой, нанға май жағып, үстіне қант ұнтағын сеуіп берсе, тез иланып, ойнап жайына кететін. 1990 жылдары бұдан да қиын кезеңдерді бастан өткергеміз, мұны да өткерерміз, тек сабыр сақтайық, қазағым...