56-шы Қара пайым-сөз: Айтқаным айнымай келгеніне таң қалып отырмын да, жай, әншейін...

Бағана айтып кеткен «Қазақтың Ұлттық күнтізбесі» деген кітабыма арнап 2010 жылдар шамасында мынадай жазба жазған екенмін: «Қазіргі кезде қазақ жастары ең бірінші кезекте атақ пен даңққа, қала берді бақуатты тұрмысқа тез жетудің төте жолы деп спортшы немесе әнші болуға ұмтылады. Әрине бұл кәсіптер де қоғамымызға керек шығар, бірақ олардың саны бірнеше мыңнан асып жығылғанда, бәрін «еркелетіп» асырауға халықтың шамасы келмей қалатынын да қазірден бастап ойлану керек» деп жазыппын. Ол кезде жұрттың бәрі «әншілер мен спортшылардың» құлы болуға дайын елігіп жүрген кез еді. Бірақ биыл карантиннің кезінде мен айтқан «бомба» жарылып, жұрт әншілерге тарпа бас салғанына куә болдық. Ойпырым-ай мен де әкем сияқты әулие болып кетпейін деп «мырс» етіп күлдім. Одан әрі былай деп жазыппын: «Ғалымдар көп болғанымен, ғылымда әлі ашылмаған жаңалық пен шешілмеген жұмбақтар көп. Мәселен, табиғаттың тылсым күшін меңгеру арқылы «мәңгілік» қозғалтқыш (двигатель) жасау, қоршаған ортаға зиянсыз қуат (энергия) өндіру, жерде машина сияқты жүретін, аспанға ұшақша ұшатын, суда кемеше жүзетін және тереңге тастай батып сүңгитін төрт қасиетті бір бойына сыйдырған көлікті ойлап табу және т.т. Осы айтқан технологиялар бүгінгі қол жеткізілген жетістіктер негізінде болашақта жасалатын болады. Егер қазірден бастап жаңалығы мол жаңа іске Алланың атымен Иман айтып сыйынып кіріссеңіз, кім біледі, мүмкін жоғарыдағы ғаламат технологияларды жасайтын Сіз боларсыз. Ғажайыптар мен ғаламаттар жасау қабілетіне ие болған «Мың бір түн» хикаясындағы жындар ертегінің кейіпкерлері емес, олар расында да бар (Құран, 51:56), бірақ көзімізге көрінбейді» деп жазбамды аяқтаппын. Айтқаным айнымай келгеніне таң қалып отырмын да, жай, әншейін...