52-ші Қара пайым-сөз: «Заңды білмеймін» деп міңгірлеу, Сізді жауапкершіліктен босатпайды

Мен негізі саясатты суқаным сүймейді, менің салам – ілім-ғылым. Бірақ маған тіркелген кейбір «таварищ қазақтар» мені арандатып, істі айналдырып әкеп, саясатқа тірей береді. Жарайды, мен өз пікірімді, көзқарасымды айтайын. Латынның «Ignorantia jus non excusat» немесе «Ignorantia Legis neminem excusat» деген сөздерінің қазақшасы «Заңды білмеу жауапкершіліктен босатпайды» (Незнание закона не освобождает от ответственности) дегенді білдіреді. Біз, қазақтар, ренжімеңіздер, өздеріміздің бойымыздағы надандықтан, тоғышарлықтан арылмай, жеке өмірімізде де, қоғамымызда да ешнәрсе өзгермейді. Көшеге шығып бақырып-шақырып «буды шығарып қайту» кешіріңіздер, көшеде «осырып» қайтқанмен бірдей нәрсе. АҚШ, Еуропада жай халықтың бақуатты тұруының жалғыз себебі – олар өз елінің заңдарын өте жақсы біледі. Олар өз елінің президент, премьер-министрімен емес, өзін заңдармен темір-бетондап қоршап алып, алиби, яғни, өзіне «кепілдік» жасап алған билік басындағы «шенеуніктер армиясымен» теке тіресіп, айтқандарын орындатып отырады. Яғни, биліктің осал жері – заңдары, өз заңдарымен өздерін ұрғанда ғана олар қалтырай бастайды. Мысалы, кешегі құлдардың ұрпағы афроамерикандықтар (негрлер) қазір, ешбір қарулы соғыссыз, құл иеленуші ақ нәсілдердің ескерткіштерін құлатып, АҚШ-ты, Еуропаны сілкілеп «дірілдетіп», айтқандарын бірте-бірте орындатып жатыр. Қазақстанда «қарулы көтеріліс» жасауға шақырып, арандатып жатқандардың бәрі дерлік шетелге қашып кеткен кешегі үлкен шенеуніктер мен бай-байшікештер. Олардың халыққа шын жаны ашыса «әй, халқым, әуелі заңды жаттап алыңдар» деуі керек еді. Жоқ, олардың барлық пиғылы, аңқау елді арандатып, қанға бояп, «төте жолмен» өздері билікке жетіп алып, қазіргі биліктегілердің жасағанын жасап, халықты одан әрі қанай беру. Бұл жерде барлық арифметика қарапайым: 2 + 2 = 4. Ең дұрысы елді дүрліктірмей, толқу жасамай (одан зияны болмаса пайда жоқ), билікті өз заңдарымен тұншықтырып, айтқанға көндіру. Мұны қазақ билігі де түсінуі керек. Әйтпесе, күндердің күнінде жағдайдың (ситуация) ушығуы уақыттың ісі. Ол кезде ешкім ешнәрсеге қарамайды, бұл дүниеде не билік қалады, не ел қалады, не болмаса үшінші тараптың құлдығына түсеміз. Сондықтан бәріміз де қабырғаларымызбен кеңесіп, дұрыс шешім қабылдау керекпіз...