Яшьләр өчен яңа проетлар
Яшьләргә үз урыннарын табу өчен шартлар булдыруга юнәлтелгән берничә яңа проект оештырылып килә. Мәсәлән, URAM – яшьләрне берләштерүгә корылган өр-яңа хәрәкәт. «ТАБА» платформасы - мәдәни проектлар башларга теләгән яшьләр өчен башлангыч. Яшьләрне патриотик тәрбияләүгә багышланган «Кайтам» медиа-проекты Татарстанда яшәп, аннан читкә китеп зур уңышлар белән яңадан республикабызга кайткан яшьләр турындагы язмаларны колачлый. Әлеге дә баягы мисаллар аша Татарстандагы мөмкинлекләр турында уңай фикер булдырылуы шарт.
Яшьләр сәясәтен тормышка ашыру уңаеннан егерме биш ел эчендә республикада "Кадрлар резервы", "Вверх!", "Политзовод", «Студентлар лигасы», Шаяннар һәм тапкырлар клубы, Волонтерлар хәрәкәте, Яшьләр парламенты һәм ТР Яшьләр хөкүмәте һ.б. проектлар аша яшьләргә зур мөмкинлекләр тудырыла. Моннан тыш, «Сәләт», «Созвездие-Йолдызлык», «Наше время - Безнең заман», «Студентлар язы», «Алтын каләм» фестивальләре иҗади, талантлы яшьләрне табуга юнәлдерелә.
Нинди проблемалар күзәтелә?
Яшьләр сәясәтенең төп бурычларын ачыклаганнан соң гына яшьләр сәясәтенең өстенлекле юнәлешләрен ачыкларга була. Безнең республикада яшьләр сәясәтен тулысынча тормышка ашыруга комачаулый торган берничә проблема бар. Минем уйлавымча, әлеге проблемалар – эш белән тәэмин итү, торак һәм социаль яклау мәсьәләсе.
Яшьләрне эш белән тәэмин итү проблемасында, иң беренче чиратта, яшьләрнең хокукларын саклап калу мөһим. Шуңа бәйле рәвештә республикада яшүсмерләрне һәм яшьләрне эшкә урнаштыру эшләрен булдыруга юнәлтелгән берничә чара күрелә. Ел саен Татарстан Республикасы Министрлар Кабинетының "Ял итү, реабилитацияләү, балалар һәм яшүсмерләрне эш белән тәэмин итү турында” дигән резолюциясе кабул ителә, җәйдә балигъ булмаганнар һәм яшьләр өчен махсус эш урыннары булдыру программасы эшләп килә.
Ләкин хәзерге вакытта безнең илдә яшьләр проблемаларына яңа караш кирәк. Яшьләр сәясәте бу өлкәдәге теоретик үсешкә нигезләнергә тиеш. Яшьләр сәясәтен комплекслы өйрәнү һәм эш, сәламәтлек, мәгариф, ял итү һ.б. белән бәйле яшьләр мохитендә заманча социологик тикшеренүләр үткәрү кулай булыр иде.
Карьера белән идарә итү проблемасын чишү дә мөһим һәм бик катлаулы мәсьәлә булып тора. Бүгенге көндә профессиональ һөнәрләр өчен җитди фаразлар юк. Мәктәпләрдә һәм һөнәри уку йортларында укыту программалары да реаль тормыш белән җитәрлек бәйләнештә түгел, укыту йортларында күп кенә белгечләр җитми. Шуңа күрә, яңа базар шартларында карьера белән идарә итү проблемалары, яшьләргә профессиональ киңәшләр кирәклеге кискен рәвештә артты. Мәгълүматны үз эченә алган яхшы эшләүче профессиональ мәгълүмат системалары да юк дәрәҗәсендә.
Тормыш дәрәҗәсен билгеләүче мөһим критерий – ул торак шартлары. Күпчелек дәрәҗәдә алар тормыш сыйфатын билгелиләр. Нәтиҗәләр буенча, яшьләрнең өчтән икесе диярлек торак белән канәгать түгел. Беренче чиратта, чишелергә тиешле проблемалар арасыннан, 30 яшькә кадәргеләр кадегориясендә, торак төзелеше проблемасын 1,7 тапкырга күбрәк кеше атап үтә. Татарстан Республикасының Госкомстат мәгълүматлары буенча, 1990 нчы елларда торак алу өчен теркәлгән яшь гаиләләрнең өлеше хәзергәчә үзгәрешсез кала бирә.
Безнең республикада яшьләр сәясәтенең әле генә карап үткән юнәлешләре бик актуаль. Шуның белән бәйле рәвештә нәтиҗә ясый алабыз: хәзерге вакытта безнең республикада яшьләрне эш белән һәм яшь гаиләләрне торак белән тәэмин итү проблемалары иң мөһиме.
Төп бурычлар нинди?
Бүгенге көндә Татарстан Яшьләр эшләре министрылыгының төп бурычы яшьләр арасында татулык һәм толерантлык атмосферасын ныгыту, яшьләр мәнфәгатьләренә җавап бирү булып тора. Хәзер яшьләр өчен һәрьяклап уңайлы һәм сыйфатлы мөһит тудырылырга, социаль яктан аларның барлык ихтыяҗларына да җавап бирелергә тиеш. Моның өчен, билгеле, министрлыкның да яшьләр белән бер дулкында булуы, заманча һәм актуаль проектлар оештырылып килүе шарт.
Автор: Гөлназ Әхмәдиева