Інфармацыйна-прапагандысцкая група райвыканкама начале з намеснікам старшыні райвыканкама Ігарам Шчасным наведалася ў Залескі музей-сядзібу М. К. Агінскага.
Сустрэча з калектывам прайшла вельмі дынамічна і зацікаўлена. З вынікамі сацыяльна-эканамічнага развіцця Смаргоншчыны пазнаёміла галоўны спецыяліст аддзела эканамічнага рэгулявання, знешне-эканамічнай і інвестыцыйнай дзейнасці ўпраўлення эканомікі, гандлю і паслуг райвыканкама Вольга Рожка. Праблемы бяспекі на вадзе і неабходнасць прытрымлівацца здаровага ладу жыцця, асабліва ва ўмовах пандэміі, асвятліў у сціслай прамове Ігар Шчасны.
Прысутных цікавілі праблемы як прыватнага, так і грамадскага характару. Так, дырэктар культурнай установы Людміла Градзіцкая прасіла растламачыць, як спрацаваў у першым паўгоддзі Смаргонскі сіліката-бетонны завод. Ігар Пятровіч адказаў, што завод працуе стабільна, аб’ёмы вытворчасці за першы квартал выраслі. І наогул, стратных прадпрыемстваў у нашым раёне стала менш за гэты перыяд.
Маладых супрацоўнікаў музея цікавілі пытанні атрымання арэнднага жылля і перспектывы дзяржаўнай падтрымкі маладых сем’яў пры будаўніцтве ўласнага жылля. Прадстаўнікі старэйшага пакалення выказалі незадаволенасць закрыццём у аграгарадку Залессе аддзялення банка, што стварыла напружанасць у рабоце паштовага аддзялення і наогул у атрыманні і здачы наяўных грошай, як прыватнымі асобамі, так і мясцовымі ўстановамі, што працуюць з наяўнымі грашовых сродкаў. Ігар Пятровіч патлумачыў, што такое рашэнне кіраўніцтва “Беларусбанка” прыняло, бо ўсе падобныя аддзяленні стратныя і запатрабаваны вельмі абмежаванай колькасцю вяскоўцаў. Большасць жыхароў раёна пры разліках карыстаюцца электроннымі карткамі і онлайн паслугамі. Атрымаць наяўныя грошы ёсць магчымасць на паштовым аддзяленні, а хутка такія паслугі будуць аказваць і мясцовыя магазіны. Што да ўстаноўкі банкамата, то гэта немэтазгодна і таму сведчанне спроба ўстанавіць яго на сілікатабетонным заводзе, дзе пазней адмовіліся ад яго.
На пытанні, што тычыліся эпідэміялагічнай абстаноўкі ў раёне, тэрмінаў адкрыцця пасля капітальнага рамонту гарадскога басейна і аздараўлення дзяцей у час вакацый, адказаў Ігар Шчасны.
Ала СТРАШЫНСКАЯ.
Фота аўтара.