Tayvandagi yarim o'tkazgichlarni ishlab chiqarish kompaniyasi (TSMC) - "Qualcomm Snapdragon" 875 protsessorlarini ishlab chiqarishni boshladi. Bu chiplar 2021- yilda flagman smartfonlar sinfining "yuragiga aylanishi" kutilmoqda.
Potensiali jihatidan amaldagi chiplarni ortda qoldirishi ko'zlangan bu ishlanma 5 nanometr ishlab chiqarish texnologiyasini taqdim etadi. Hozirgi 7nm Snapdragon 865 chiplari bilan taqqoslaganda, yangi protsessor quvvat sarfini kamaytirib, smartfon ish faoliyatini yaxshilaydi.
Ma'lumotlarga ko'ra, Snapdragon 875 protsessori 1+3+4 konfiguratsiyali sakkiz yadroga ega bo'ladi, xususan, unda bitta super yadroli Cortex-X1 mavjud bo'lib, hozirgi Cortex'ga nisbatan ish samaradorligini 30 foizga oshirishni ta'minlaydi. Shuningdek, yangilangan chip yuqori samarali Adreno 660 grafik ishlov berish blokini o'z ichiga oladi.
Xabar berilishicha, Amerikaning "Qualcomm" kompaniyasi uchinchi chorak oxirida - sentyabrdan boshlab Tayvandagi TSMC zavodidan Snapdragon 875 protsessorlarini olishni boshlaydi. Yangi chipning rasmiy taqdimoti shu yil oxirida bo'lib o'tadi. Snapdragon 875 SoC platformasiga asoslangan birinchi smartfonlar kelgusi yilning birinchi choragida bozorga chiqishi kutilmoqda.
A'zamjon Ismoilov