Испаниянинг Барселона шаҳрида архитектура гўзалликлари кўплаб топилади. Дунё бўйлаб миллионлаб сайёҳлар ушбу гўзалликлардан баҳраманд бўлиш мақсадида ташриф буюришади.
Шундай гўзалликлар қаторида яна бир кичик креативлик ва юксак дизайн намунаси ҳисобланган Happy Pill "дорихона"си мавжуд.
"Дорихона"га кириб боришингиз билан ранг-баранг шаклдаги, бир-биридан ширин ифорли турли катталикдаги жозибали таблеткалар, капсулалар, ҳаб дорилар ва бошқаларни учратиш мумкин.
Оппоқ кийимдаги "фармацевтлар" сизни кутиб олишади ва қўлингизга сиз кўриб турган "дори-дармонлар"дан истаганингизча олишингиз учун махсус қутилар ва таблеткадонлар беришади. Бу идишларни сиз дунёдаги энг ширин" дори-дармонлар" билан тўлдиришингиз мумкин. Қизиқ тўғрими? Ҳеч қандай рецепт шарт эмас.
Бир зумга ўйланиб қоласиз! "Дори-дармонлар" ни завқланиш учун бахтни туюш учун ҳам сотиб олиш мумкин эканлигини илк бор ҳис қиласиз!
Ажабтовур ушбу "дорихона" аслида ширинлик дўкони эди.
Studio-M дизайнерлик компанияси томонидан яратилган ушбу ширинлик дўконининг ҳар бир элементи, ҳар бир маҳсулотлар кўриниши юксак креативлик ва дид билан ишланган.
Ширинлик дўконидан турли-туман ширинликлар, шоколадлар, мармеладлар, шимиш учун сўрғичлар ва витаминларни бир-биридан ажойиб контейнерлар, шиша идишлар ва таблеткадонларда ҳарид қилишингиз мумкин.
Барселонага борган сайёҳлар учун ёдидан кўтарилмайдиган ҳаяжон ва кўтаринки кайфият бера оладиган ушбу ширинликлар дўкони Happy Pill номини қайсидир маьнода тўла оқлаганлигини кўриш мумкин.
Маълумотлар ахборот хамкоримиз Pharmblog каналидан олинди.