"Сливадан алып, карлыганга кадәр үскән бу питомник агачлары безнең климатка тиз яралаклаша", - ди бакчачылар.
Борай питомнигы күрше төбәкләрдә яшәүчеләр арасында да популярлык яулый. Башкортстанда үстерелгән алмагачларны һәм груша агачларын Ырынбур өлкәсенә, Татарстанга һәм Пермь краена да алып китәләр. Питомникта җиләк-җимеш агачларын утырту процессын республиканың атказанган укытучысы Галия Мөгаллимова җитәкли.
- Алма һәм груша орлыкларыннан үстерелгән кыргый үсентеләр прививкадан соң гына җимеш бирәчәк. Агачларны дөрес тәрбияләгәндә һәм тукландырганда беренче уңышны 5-7 елдан соң җыярга мөмкин булачак, - ди кайчандыр мәктәп янындагы тәҗрибә участогын җитәкләгән укытучы.
Бүген исә Борай җиләк-җимеш питомнигында барлыгы 100 төрдән артык агач һәм куак үсә. Бирегә үсентеләр алырга республиканың төрле почмагыннан бакчачылар килә. Гомумән, урындагы бакчачылар арасында питомник дан казанган.
Питомникта беренче агачлар 2004 елда барлыкка килгән. Ул вакытта Галия Мөгаллимова Борай мәктәп яны тәҗрибә участогын алып барган булган. Биолог пенсиягә чыккач та яраткан эшен ташламаган. 16 ел эшләү дәверендә питомникның мәйданы 3 гектардан 78 гектарга кадәр арткан.
- Төньяктагы Тәтешле, Балтач, Борай, Яңавыл районнары, Нефтекама шәһәре бакчачылары бу питомникка еш килә. Питомник туфрагы - безнең бакчалар туфрагы. Шуңа да үсентеләр тиз арада тамырлана. Безнең салкын климатта да алар яхшы үсә. Ә уңышы - искиткеч, - ди бакчачы Әнфис Гайнетдинов.
Бу эшендә бүген Галия апага балалары ярдәм итә. Эшен дәвам итүче оныклары да үсеп килә инде аның. Галия апа киләчәктә питомникны тагын да зурайтырга хыяллана. Аның бу хыялы да тормышка ашар әле!
Автор: Гөлия Мөгаллимова