Ангеле Христов святый,к тебе припадая молюся,хранителю мой святый,преданный мне на соблюдение души моему грешному от святого крещения, аз же своею леностию и своим злымобычаем прогневах твою пречистую светлость и отгнах тя от себе всеми студными делы: лжами, клеветами, завистию, осуждением, презорством, непокорством, братоненавидением и злопомнением, сребролюбием, прелюбодеянием и яростию, скупостью, объядением безсытости и опивством, многолаголанием, злыми помыслы и лукавыми, гордым обычаем и блудным возбешением, имый самохотение на всякое плотское вождение. О, злое мое произволение, его же и скоти безсловеснии не творят! Да како возможеши воззрети на мя, или приступити ко мне, аки ко псу смердящему. Которыма очима, Ангеле Христов, воззриши на мя, оплетшася зле во гнусных делах. Да како уже возмогу отпущения просити горьким и злым моим и лукавым деянием, в няже впадаю по вся дни и нощи и на всяк час. Но молюся ти припадая, хранителю мой святый, умилосердися на мя грешнего и недостойного раба твоего (имя), буди ми помощник и заступник на злаго моего сопротивника, святыми твоими молитвами, и Царствия Божия причастника мя сотвори со всеми святыми, всегда, и ныне, и присно, и во веки веков. Аминь.
