Ўзбекистон Республикаси Инновацион ривожланиш вазирлиги Словакиянинг “Chirana” компанияси ва россиялик ҳамкорлар билан биргаликда ўпканинг сунъий вентиляцияси аппаратлари (ИВЛ) ишлаб чиқариш бўйича технологиялар трансферини амалга оширмоқда.
Вазирликдан маълум қилишларича, ИВЛ қурилмаларини ишлаб чиқариш жорий йил май ойида бошланади. Бунинг учун пойтахтимизнинг Бектемир туманида ишлаб чиқариш участкаси барпо этилади.
Бу ерга ишлаб чиқаришни маҳаллийлаштириш ҳисобига биринчи босқичда 3 миллион АҚШ доллари миқдорида инвестиция киритилади. Иккинчи босқичда 6 миллион АҚШ долларгача инвестициялар жалб этилиб, жами 130 та иш ўрни ташкил этилиши режалаштирилган.
– Ўпканинг сунъий вентиляцияси аппаратлари ҳозирги кунда 12 мамлакатда ишлаб чиқарилади, – дейди Словакиянинг “Chirana+” компанияси бош директори Василий Шимко. – “Chirana” дунёдаги энг машҳур олтита бренддан бири. Ускуналаримиз бошқа компанияларнинг шундай турдаги жиҳозларидан фарқли равишда уч босқичли вентиляцияни амалга оширади. Ўзбекистонда бундай ускуналар ишлаб чиқарувчи завод барпо этилиши аҳоли саломатлиги йўлида жуда муҳим қадамдир.
Лойиҳа доирасида коронавирус бўйича мамлакатдаги мавжуд вазият ва беморлар учун ИВЛ ҳамда шахсий гигиена воситаларига эҳтиёжни ҳисобга олган ҳолда, Ўзбекистонга минг дона нафас олиш контури, 500 дона намлик коллектори билан нафас олиш контури, минг дона бир мартали бактериал-вирусли фильтрлар беғараз асосда топширилади.
Мазкур ишларни амалга ошириш мақсадида “Chirana Asia” Словакия-Россия-Ўзбекистон қўшма корхонаси ташкил этилди. Компания “Ўзбекистонда ишлаб чиқарилган” ёрлиғи остида юқори технологик тиббий асбоб-ускуналар ишлаб чиқаради. Марказий Осиёда ягона бўлган мазкур лойиҳа тиббиётда импорт ўрнини босиш жараёнини жадаллаштиради.
Корхона маҳсулотларини таъмирлаш учун эҳтиёт қисмлар ва хизмат кўрсатиш маркази ҳам барпо этилади. Бу ерда ИВЛ ва НДА (наркоз-нафас олиш аппарати) қурилмалари учун ноёб, мобил ва замонавий сервис хизмати йўлга қўйилади. Анестезиология соҳасида юқори малакали хорижий мутахассислар таклиф қилинган ҳолда ИВЛ ва НДА ускуналаридан фойдаланиш бўйича семинарлар ўтказилиши режалаштирилган.
Келгусида ишлаб чиқарилган маҳсулотларни қўшни Тожикистон, Туркманистон, Қирғизистон ва Афғонистонга сотиш режалаштирилмоқда.
Фармацевтика тармоғини ривожлантириш агентлиги Матбуот хизмати
Кўпроқ янгиликлар бизнинг @Uzpharm_agency telegram-каналида
“Uzpharmagency” телеграм каналида эълон қилинган материаллардан нусха кўчириш, тарқатиш ва бошқа шаклларда фойдаланишда каналимиз манба сифатида кўрсатилиши шарт!
Манзилимиз: 100084 Тошкент шаҳри, Чингиз Айтматов кўчаси, 1-А уй.
Телефон: (998 71) 203-81-81
Электрон манзил: farmagentlik@minzdrav.uz
Uzpharmagency расмий саҳифалари:
Telegram | Instagram | Facebook | Youtube | Twitter