Rajab oyi barakali va ulug' oy bo'lib, undagi ozgina yaxshi amal evaziga ko'plab ajru savoblar beriladi. Shu bois bu oyni g'animat bilib, unda yanada ko'proq xayrli amallar qilishga intilish lozim.
- Duo qilish.
Rasululloh sollallohu alayhi vasallam aytdilar: “Besh kecha borki, unda duolar rad etilmaydi: rajab oyining avvalgi kechasi; sha'bon oyining yarmidagi kecha; juma kechasi; fitr kuni kechasi va qurbonlik kechasi” (Ibn Asokir rivoyati).
Rajab oyi kirganda Nabiy sollallohu alayhi vasallam: “Allohumma barik lana fi Rajabin va Sha'bana, va ballig'na Ramazona” (Allohim, rajab va sha'bon oylarida bizlarga baraka ato qilgin va bizlarni Ramazon oyiga yetkazgin!) deb duo qilganlar (Imom Bayhaqiy va Imom Tobaroniy Anas ibn Molik roziyallohu anhudan rivoyat qilgan).
- Ro'za tutish.
Usmon ibn Hakimdan rivoyat qilinadi: “Sa'id ibn Jubayrdan rajab oyida turganimizda rajab ro'zasi haqida so'radim. U: “Ibn Abbosning: “Rasululloh sollallohu alayhi vasallam ro'za tutar edilar, hatto og'izlarini ochmasalar kerak, der edik. Og'izlari ochiq bo'lardi, hatto ro'za tutmasalar kerak, der edik”, deyayotganini eshitganman”, dedi”.
- Istig'for aytish.
Rasululloh sollallohu alayhi vasallam Rajab oyida ko'p istig'for aytishga targ'ib qilganlar.
Sayyidul istig'for: “Allohumma anta robbiy laa ilaha illa anta xolaqtaniy va ana a'bduka va ana a'la ahdika va va'dika mastatotu a'uzu bika min sharri ma sona'tu, abuu laka bini'matika alayya va abuu bizambiy fag'firliy fainnahu laa yag'firuz zunuba illa anta”.