Suriyaning Idlib viloyatida muxolifatchi kuchlar otryadlari turk qo'shinlari rahnamoligida hukumat armiyasiga qarshi janglarni davom ettirmoqda. Kechagina Sarakib shahri muxolifatchi va turk qo'shinlaridan tortib olingandi. Ammo bugun kechasi ikki o'rtada qaqshatqich janglar yuzaga keldi. Buning natijasida Turkiya harbiylari hukumat armiyasining oltita tankini, ikkita havo hujumiga qarshi mudofaa uskunasi, uchta BTR, 5 ta pikapini yo'q qildi. Janglar davomida 327 nafar Suriya armiyasi askari halok bo'ldi.
Suriyaning Idlib viloyatida yuzaga kelgan to'qnashuvlarga, afsuski, xalqaro miqyosdagi ekspertlar noto'g'ri baho bermoqda. Ularning aytishicha, Turkiya Suriya ichkarisida urush harakatlari olib borishga haqli emish. Shu yo'l bilan o'z chegaralarida xavfsizlik barqarorligini saqlab qolarmish. Vaholanki, Suriya suveren davlat. O'z muammolarini o'zi mustaqil tarzda bartaraf etishga haqli. Chetdan mamlakat ichkarisiga kirib keladigan Turkiya, Eron, Rossiya va boshqa davlatlar faqat boylik ilinjidagina bu davlat ichkarisiga kirib zo'ravonlik qilishi mumkin. Agar Turkiya haqiqatan o'z chegaralarida xavfsizlik barqaror bo'lishini istaganda, Suriyada hukumat armiyasiga emas, terrorchi kallakesarlarga qarshi kurashgan bo'lardi. Hukumat armiyasi xuddi o'sha terrorchi, muxolifatchi kuchlarga qarshi kurash olib bormoqda.
Xullas, hozirgi kunda kimki zo'r bo'lsa, o'shaning gapi keskir chiqmoqda. Ishqilib xudo har bandasiga insof, tavfiq bersin.