Rossiya Afg'onistondagi «Tolibon» harakatidan «Rossiyada faoliyati taqiqlangan terror tashkiloti» degan maqomni olib tashlashi mumkin. Shu haqda Rossiya prezidentining Afg'onistondagi rasmiy vakili Zamir Qobulov rasman ma'lum qildi. Vakil aytdiki, agar Birlashgan millatlar tashkiloti «Tolibon»ni terror tashkiloti deb atashdan voz kechsa, Rossiya ham darhol yuqorida tilga olingan maqomni olib tashlaydi.
Rossiya tarafi AQSh va «Tolibon» o'rtasida tuzilgan tinchlik bitimini yuqori baholadi. Albatta, buni dunyo ko'rib turibdi. Uzoq yillar davom etgan fuqarolar urushi, xunrezliklar inshoolloh endi barham topadi. Afg'oniston xalqi tinchlikda, xotirjamlikda umr kechira boshlaydi. Begunohlarning qoni to'kilmaydi. Otalar boladan, bolalar otadan, akalar ukadan, opalar singildan ayrilib faryod chekmaydi.
Ikki tomonlama tinchlik bitimi tuzilishida respublikamiz prezidenti Shavkat Mirziyoyevning ham alohida hissasi bor. Prezidentimizning sa'y-harakatlari, jonbozliklari, tashabbuskorliklari bois shunday tarixiy hodisa yuz bergan bo'lsa ne ajab.
Eslatib o'tamiz, AQSh va «Tolibon» o'rtasidagi tinchlik bitimini imzolash masalasi 2018 yil iyulidan beri muhokama qilib kelingan. Nihoyat 2020 yil 29 fevral kuni Qatar poytaxti Doxa shahrida xuddi o'sha tarixiy voqea yuz berdi. Ikki tomonlama tinchlik bitimi imzolandi. Shundan so'ng Amerika prezidenti Donald Tramp Afg'onistondan o'z mamlakati qo'shinlari olib chiqib ketilishini ma'lum qildi.
«Tolibon» 1994 yili Afg'onistonda fuqarolar urushi avj pallaga kirgan bir mahal tuzilgan. 1996-2001 yillari toliblar Afg'oniston hukumat tepasida bo'lishdi. 2001 yili ularning hokimligiga barham berilgach, partizancha urush harakatlarini boshlashdi. Shu tarzda Afg'oniston hukumat qo'shinlari, NATO ning Afg'oniston hamda Pokistondagi armiyasiga qarshi kurashga mukkadan ketishdi.