Farg'ona va Qo'qon shaharlarini o'zaro bog'lab turuvchi yo'lning Bag'dod tumanidan o'tuvchi qismida joylashgan “Qorako'l” mahalla fuqarolar yig'ini hududida ilk innovatsion svetofor o'rnatildi. E'tiborli jihati shundaki, piyodalarga qulaylik yaratish hamda ularning xavfsizligini ta'minlash maqsadida o'rnatilgan bu svetoforni piyodalar boshqaradi.
Ma'lumki, bu yo'ldan transport vositalari juda ko'p harakatlanadi, shu bilan birga, hududda maktabgacha ta'lim muassasasi va umumiy o'rta maktabi joylashgan bo'lib, bolalar bog'cha va maktabga borish uchun yo'lning ayni shu qismidan o'tishlari kerak. Ming afsus, gohida piyodalar yo'lning belgilanmagan qismlaridan kesib o'tishlari, gohida haydovchilarning tezlik qoidalariga amal qilmasliklari oqibatida, ko'plab noxush hodisalar yuz berardi. Shu sababli, mahalla aholisi piyodalar o'tish yo'lagida maxsus svetofor o'rnatish yuzasidan Farg'ona viloyati Ichki ishlar boshqarmasi Yo'l harakati xavfsizligi boshqarmasi rahbariyatiga rasmiy murojaat yo'llagan edilar. Aholi murojaati qisqa muddat ichida ijobiy hal qilindi.
– Bu svetoforning o'rnatilishi aholining, ayniqsa, bolalarning yo'llardagi xavfsizligini ta'minlashga xizmat qiladi, – deydi mahalla faollaridan biri Tojimahammad aka Ortiqov. – Shaxsan o'zim bog'chaga nevaralarimni har kuni olib kelaman va albatta piyodalar uchun belgilangan yo'lakdan o'taman. Shu kungacha juda qiynalardik yo'ldan kesib o'tishga. Mashinalar viz-viz harakatlanib, hatto katta yoshdagilar ham yurak yutib o'tishardi. Mana, ming shukr, ko'pchilikni o'ylantirib turgan masala hal etildi, har kunlik tashvishimizdan qutildik. Buning uchun rahbarlarimizga ming rahmat aytamiz.
Viloyat IIB YHXB aholida bataloni 2-otryadi komandiri, kapitan Shokirjon Mirzaqulovning aytishicha, joriy yilda boshqarma tashabbusi bilan tumandan o'tuvchi boshqa yo'llarning harakat tig'iz bo'lgan qismlarida ham shunday zamonaviy svetoforlar o'rnatish ko'zda tutilgan.