ПОВЕСТЬ ВРЕМЕННЫХЪ ЛЕТ ЧЕРНОРИЗЦА ФЕДОСЬЕВА МАНАСТЫРЯ ПЕЧЕРЬСКАГО ОТКУДУ ЕСТЬ ПОШЛА РУСКАЯ ЗЕМЛЯ <...> И ХТО В НЕЙ ПОЧАЛЪ ПЕРВЕЕ КНЯЖИТИ И ОТКУДУ РУСКАЯ ЗЕМЛЯ СТАЛА ЕСТЬ
Се начнемь повѣсть сию.
По потопѣ бо 3-е сынове Ноеви роздѣлиша земьлю: Симъ, Хамъ, Афетъ. Яся въстокъ Симови: Перьсида, Ватрь, доже и до Иньдикия в долготу, и в широту и до Нирокуриа, якоже рещи от въстока доже и до полуднья, и Сурия, и Мидиа по Ефратъ рѣку, и Вавилонъ, Кордуна, асурианѣ, Месопотамиа, Аравиа Старѣйшая, Елумаисъ, Индия, Аравия Силная, Кулии,Комагины, Финикия вся.
А Афетови же яся полунощная страна и западная: Мидия, Олъвания, Армения Малая и Великая, Каподокия, Фефлагони, Галатия, Кольхысъ, Воспорий, меоти, дереви, сармати, тавриани, Скуфия, фраци, Македония, Далматия, молоси, Фесалия, Локрия, Пеления, яже и Полопонисъ наречется, Аркадия, Ипириноя, Илурикъ, словене, Лухития, Аньдриакия, Аньдриатиньска пучина. Имать же и островы: Вританию, Сикелию, Евию, Родона, Хиона, Лѣзвона, Куфирана, Закуньфа, Кефалиния, Ифакину, Керкуру, и часть всякоя страны, и нарицаемую Онию, и рѣку Тигру, текущюю межи Миды и Вавилономъ; до Понетьского моря, на полунощныя страны, Дунай, Днепръ и Кавькасийскыя горы, рекше Угорьскыя, и оттуда, рекше, доже и до Днепра, и прочаая рѣкы: Десна, Припеть, Двина, Волховъ, Волга, иже идеть на въстокъ, въ часть Симову.
Въ Афетови же части сѣдить русь, чюдь и вси языцѣ: меря, мурома, всь, мордва, заволочьская чюдь, пермь, печера, ямь, югра, литва, зимигола, корсь, лѣтьгола, либь. Ляховѣ же, и пруси и чюдь присѣдять к морю Вяряскому. По сему же морю сѣдять варязи сѣмо къ вьстоку до предѣла Симова, по тому же морю сѣдять къ западу до земли Агаряньски и до Волошьскые.
По раздрушении же столпа и по раздѣлении языкъ прияша сынове Симовы въсточныя страны, а Хамовы же сынове полуденныа страны. Афетови же сынове западъ прияша и полунощьныя страны. От сихъ же 70 и дву языку бысть языкъ словенескъ, от племени же Афетова, нарѣцаемѣи норци иже суть словенѣ.
По мнозѣхъ же временѣхъ сѣлѣ суть словени по Дунаеви, кде есть нынѣ Угорьская земля и Болгарьская. От тѣхъ словенъ разидошася по земьли и прозвашася имены своими, кде сѣдше на которомъ мѣстѣ. Яко пришедше сѣдоша на рѣцѣ именемъ Моравѣ, и прозвашася морава, а друзии чесѣ нарекошася. А се ти же словѣне: хорвати бѣлии, серпь и хорутане. Волохомъ бо нашедшим на словены на дунайскые, и сѣдшимъ в нихъ и насиляющимъ имъ. Словѣне же ови пришедше и сѣдоша на Вислѣ, и прозвашася ляховѣ, а от тѣхъ ляховъ прозвашася поляне, ляховѣ друзии — лютицѣ, инии мазовшане, а инии поморяне.
Такоже и тѣ же словѣне, пришедше, сѣдоша по Днепру и наркошася поляне, а друзии деревляне, зане сѣдоша в лѣсѣхъ, а друзии сѣдоша межи Припѣтью и Двиною и наркошася дреговичи, и инии сѣдоша на Двинѣ и нарекошася полочане, рѣчькы ради, яже втечеть въ Двину, именемь Полота, от сея прозвашася полочанѣ. Словѣне же сѣдоша около озера Илмера, и прозвашася своимъ именемъ, и сдѣлаша городъ и нарекоша и́ Новъгородъ. А друзии же сѣдоша на Деснѣ, и по Семи, и по Сулѣ и наркошася сѣверо. И тако разидеся словенескъ языкъ, тѣмьже и прозвася словеньская грамота.
НОВГОРОДСКАЯ БОЛЬШАКОВСКАЯ ЛЕТОПИСЬ
Потом же многим лѣтомъ минувшимъ, Бжіим Дхомъ обрѣтеся ов мужа і преложиша wт жидовскаго языка на гречьекыіи языкъ. А wт Седмаго собора до преложения Стых кнгъ на словенскиі языкъ Кирилом Филосфомъ ркв лѣта. А wт преложения Стых кнгъ до крщения Рускои земли ркв лѣта.
В лѣт. Приндоша рус, словенн, чюд, лопь, кривичи к варягом і испросиша себь у них властелей. И ізбрашас(я) г браты с роды своими: Рюрик, Синеус, Трувор.
Бысть язык словенескъ племени Аметова, нарицаемыи і норъці, и іже суть словени. По мнозѣхъ временѣх сѣли суть словени по Дунаеви, гдѣ ннѣ есть угорская земля и болгарская. I тѣх словеницы разыдошася. Волотовом бо нашедшим на словени на дунанския, сѣвшимъ им в них і насилствующимъ им. Словени ж, ови, пришедше, сѣдоша на Вислѣ рѣки и прозвашася ляхове, инiи поморянѣ. Тако же і словени, пришедше, сѣдоша по Днепру і нарскошас поляни. А друзиі древляне, зане сѣдоша в лѣсехъ. А ные сѣдоша межю Перепѣтью і Двиною и нарекошася древницѣ, а иныи полочанѣ, рѣки ради Полоты, иже тече в Двину.
«Временник сирѣч лѣтописец о бытии всего мира въкратцѣ изъбрано от пространнаго лѣтописания»:
«Русь убо и словене обое един есть родъ, понеже Русь нарицается от цвѣта лица и власов, ниже бо преизлишну бѣлость имѣютъ якоже Фряги и Италианѣ, ниже черность якоже Греции и Ефиопы, но посредственно от сихъ, рекше русовласы».