“МЫ Ў АДКАЗЕ ЗА ТЫХ, КАГО ПРЫРУЧЫЛІ”

Мы ў адказе за тых, каго прыручылі! Роўна год прайшоў з моманту здарэння, якое выклікала шырокі рэзананс не толькі ў Брэсцкай вобласці, але і за межамі Беларусі: у Пружанскім раёне жывадзёр з асаблівай жорсткасцю расправіўся з сабакам. Але жывёліну выратавалі неабыякавыя людзі.

Грэя, ці Дзіка – так валанцёры назвалі сабаку, не ведаўшы сапраўднага імя, знайшлі год таму непадалёк ад Ружан. Жывёла была знявечаная і ў літаральным сэнсе ледзь дыхала. За год Грэй перанёс не адну аперацыю. Зрок вярнуць так і не ўдалося – сабака поўнасцю сляпы. Але… ён атрымаў сапраўды новае жыццё – з’явіўся новы гаспадар, і галоўнае – любячы.

– Вучыліся ўсяму: і хадзіць па лесвіцы, і спускацца/падымацца па склонах. Зараз сабака нават не ў адно дрэва не ўразаецца. Вельмі дружалюбны, ніякай агрэсіі. І мне іншы раз здаецца, што ён не лічыць сябе сляпым (усміхаецца), – кажа новы гаспадар жывёлы Марыя Амельянюк.

На працягу ўсяго года валанцёры, якія выратавалі сабаку, намагаліся дабіцца заслужанага (па іх меркаванні) пакарання для былога гаспадара сабакі. Пакуль – беспаспяхова. Мужчына апраўдвае сябе тым, што Грэй нібыта пакусаў яго сям’ю. А таму максімальнае пакаранне, якое яму далі, – 10 базавых велічынь. Толькі на лячэнне сабакі (прызнаюцца валанцёры) было затрачана ў разы больш. Дарэчы, заабаронцы зараз выступаюць за ўзмацненне адказнасці за жорсткае абыходжанне з жывёламі.

Летась у Брэсцкай вобласці было ўзбуджана чатыры крымінальныя справы за жорсткае абыходжанне з жывёламі – у Івацэвіцкім раёне, Баранавічах і дзве ў Брэсце.

Між тым валанцёры, якія выхожвалі Грэя, спыняцца не збіраюцца і будуць намагацца, каб віноўнік інваліднасці сабакі атрымаў па заслугах.