Анджэй Сапкоўскі “Вядзьмар. Апошняе жаданне” (1993 г.), 5/5.
⠀
Перадгісторыя. У дзяцінстве я вельмі любіла фэнтэзі і чытала ўсё, што траплялася пад руку ў бібліятэцы. Вельмі рана да мяне трапіў “Хобіт”, потым “Уладар пярсцёнкаў”, І панеслася… А потым універ і горы класікі, і амаль на дзясятак гадоў гэты жанр знік з майго жыцця.
⠀
Трэцяя кніга, прачытаная ў гэтым годзе, нагадала мне, за што я люблю фэнтэзі. За магчымасць збегчы ў выдуманыя сусветы, дзе можна сустрэць адважных ваяроў і жахлівых пачвар. Чытаю гэтую кнігу другі раз, першы быў у арыгінале па-польску. Але цяпер буду збіраць беларускія выданні.
⠀
Кожны зарабляе, як умее. Вядзьмар Геральт выдатна знішчае пачвар, што і прыносіць яму грошы. Гэтая кніга складаецца з некалькі апавяданняў, якія апісваюць яго прыгоды. Звязваюцца паміж сабой яны фрагментамі з гісторыяй Ведзьмара і размешчаныя не ў храналагічным парадку.
⠀
Сапкоўскі стварыў цудоўны свет, магічны, містычны, атмасферны. Ён актыўна карыстаецца адсылкамі да поп-культуры, перапрацоўвае вядомыя казачныя гісторыі і міфы, дадаючы ім патрэбнай жорсткасці. Дынамічны і захапляльны аповед, акуратная і дарэчная лінія кахання. Вызначаецца кніга і добрым гумарам. Часам грубаватым, але ён пасуе персанажам кнігі. Ну а дуэт Геральт-Казялец — выдатная літаратурная парачка.
⠀
Дарэчы, Геральт — выдатны пацыент для псіхатэрапеўта 😏 Бо ў ім хаваецца столькі праблем, якія цягнуцца з дзяцінства. І гэтыя праблемы ў цяперашнім часе перашкаджаюць ведзьмару завязваць нармальныя стасункі з людзьмі. Тым цікавей назіраць за псіхалогіяй і развіццём гэтага персанажа.
⠀
І колькі слоў хочацца сказаць пра само выданне: цвёрдая вокладка, шчыльная крэмавая папера і цудоўнае афармленне ад украінскага ілюстратара Улада Пятручыка. Зірніце, якія цудоўныя дробязі афармлення можна знайсці ўнутры.
Нумары старонак аздабляюць выявы мячоў, і калі прыгледзецца, то можна заўважыць, што яны розныя! Усё ў адпаведнасці з тэкстам. Дробязь, а прыемна😊 Пераклад Кацярыны Маціеўскай таксама без пытанняў.
А вось пра экранізацыю ад Нэтфлікса прамаўчу. Няхай мой блог стане месцам свабодным ад абмеркавання серыяла і жахлівага галоўнага героя 😁