22-гадовая "Міс Беларусь 2018" Марыя Васілевіч выступіла з прамовай на тэлеканале "Беларусь 3". Яна балатуецца ў дэпутаты Палаты прадстаўнікоў па Кальварыйскай выбарчай акрузе №104. Яе сапернікі — апазіцыянер Максім Вінярскі і дырэктар "Рэмаўтадара Фрунзенскага раёна" Генадзь Насевіч.
Пра што гаварыла Васілевіч? Яна расказала пра сваю сям'ю і пра сябе. На сённяшні дзень "Міс Беларусь 2018" працуе тэлевядучай Белтэлерадыёкампаніі, з'яўляецца пастаяннай спадарожніцай кіраўніка дзяржавы, атрымала яго спецпрэмію.
У парламенце Марыя Васілевіч збіраецца зрабіць законы зразумелымі кожнаму беларусу, бо яны "пішуцца для людзей". Таму яна выступае з ініцыятывай "сістэматызацыі і актуалізацыі пад сучасныя рэаліі існуючых нарматыўна-прававых актаў".
Таксама кандыдатка ў дэпутаты хоча падняць пытанне "пра ўдасканаленне сістэмы адукацыі". Яна настойвае на тым, што "неабходна адмовіцца ад абмеркавання гэтых праблем толькі ў высокіх кабінетах". А каб з Беларусі не з'язджала таленавітая моладзь, кандыдатка настойвае "на стварэнні стымулаў для самарэалізацыі і кар'ернага росту маладых людзей".
Марыя Васілевіч мае намер "дамагацца, каб дзейнасць парламента стала больш адкрытай і публічнай", спадзяецца на "эфектыўнае супрацоўніцтва народа і ўлады". Сябе яна называе "голасам ініцыятыўнай моладзі".
"У выпадку майго абрання вы заўсёды зможаце звярнуцца да мяне за падтрымкай", — паабяцала "Міс Беларусь 2018", якая так і не згадала пра гэты свой тытул. Не згадваецца ў яе прамове і Беларускі рэспубліканскі саюз моладзі, ад якога яна вылучаецца ў дэпутаты.
