4 сентябрь көнне Казаклар авылы клубында район мәдәният хезмәткәрләре һәм китапханәчеләре катнашында семинар-киңәшмә булып үтте. Исегезгә төшерәбез, быел әлеге клубка республика программасы нигезендә капиталь ремонт үткәрелде һәм ул 6 август көнне ТР Дәүләт Советы Рәисе Фәрит Мөхәммәтшин, ТР Премьер-министры урынбасары, авыл хуҗалыгы һәм азык-төлек министры Марат Әхмәтов һәм республикабызның муниципаль берәмлекләр Советы Ассоциациясе Рәисе Әгъзам Гобәйдуллиннар катнашында тантаналы шартларда ачылды.
Киңәшмәдә алдан тәгаенләнгән көн тәртибе буенча Казаклар авылы китапханәчесе Альбина Рәхмәтуллина үзенең эш алымнары белән таныштырып, хезмәт тәҗрибәсе белән уртаклашса, Теләче җирлекара китапханәләр директоры Ризидә Дәүлиева район китапханәчеләренең 8 айлык эш нәтиҗәләре турында сөйләде. Ә район мәдәният хезмәткәрләренең профсоюзлар берлеге рәисе Елена Фатыйхова коллектив шартнамәдәге үзгәрешләрне яктыртып чыгыш ясады. Район мәдәният йорты методисты Зөлфия Ибраһимова авыл клублары һәм мәдәният йортларының 8 айлык эшчәнлегенә анализ ясаса, Лесной авылы клубы мөдире Гөлия Вохмина Тукай районында алган тәэсирләре белән уртаклашты. Теләче туган якны өйрәнү музее директоры Фаягөл Имамиева 8 айлык эшчәнлекләрен бәян итеп, переспектив эш планнары белән таныштырды. Азактан район мәдәният бүлеге җитәкчесе Даут Ихсанов чыгышы тыңланылды.
Ул үзенең чыгышында 8 айлык эшчәнлекләренә нәтиҗә ясап, алда зур бурычлар торуын билгеләп үтте. Болар - Бөек Җиңүнең - 75 еллыгы, ТАССРның - 100 еллыгы кебек күренекле даталар. “Аларга әзерлек чаралары бүген үк барырга тиеш”, - диде ул ассызыклап. Беренчесе уңаеннан районда “Җиңү безнең йөрәкләрдә!” дип исемләнгән сәнгать фестивале узачак. Бу уңайдан, 3 сентябрьдә, муниципаль район башкарма комитеты житәкчесенең аны оештыру һәм үткәрү буенча 498 номерлы карары дөнья күрде инде. Шулай ук киңәшмәдә “Созвездие - Йолдызлык - 2020” сәнгать фестиваленә әзерлек, грантлар язуда, “Милли проектлар”ны тормышка ашыруда активлык күрсәтү, клуб һәм мәдәният йортлары биләмәләрен тәртиптә тоту, аларны төзекләндерү, чәчәкләр, агачлар утырту кебек мәсьәләләр дә калку күтәрелде. Моннан тыш, семинарда авыл клубларында һәм мәдәният йортларында, 1 июльдән 1 августка кадәр дәвам иткән ”Иң яхшы авыл клубы һәм мәдәният йорты” дип исемләнгән республикакүләм конкурсның район этабы турында да сөйләшү булды. Конкурсның республика этабында районыбыз данынЛесной, Субаш авыллары клублары, Олы Мәтәскә, Иске Җөри авыллары мәдәният йортлары яклаячак.
Фәнил Гаязов.