425-ші Қара пайым-сөз: Жаңа жыл өтті, Сайлау өтті, күн ұзарды, жақсылықтан ешқашан күдер үзбеңіздер...

Айналайын қазағым христиандардың жаңа жылын өз жаңа жылындай қарсы алып «жақсы отырмыз, әәә» (хорошо сидим) деп ақаң, виски, ром, скотчты тойғанша ішіп, тырайып қалып, одан ес жиып болам дегенше, бастырмалатып «Христостың туған күні» келіп жетіп, ауырып тұрған бастарын жазып, біраз «бғұ-ұ-ұ-ұ» деп сілкініп орнынан тұрам дегенше Сайлау да болып қалды. Ресми деректерде халықтың 63 пайызы дауыс берді деп даурыққанмен, кеше түнде інімнің үйінде бас қосқан туыстарымнан «қане қай партияға дауыс бердіңдер?» десем, ешқайсысы үндемейді, сөйтсем дауыс берген жалғыз мен ғана екенмін. Сонда 63 пайыз дауыс беру қалай пайда болды деп таң қалдым. Жалпы деймін де, біздер жаңа жыл күні, Елбасы күні, пәлен мереке күні деп сол күннен бір ғажайып күткенмен, шын мәнінде ол жылдағы 365-366 қарапайым күндердің бірі ғана. Төрт жастан асқан ұлым Омар жаңа жыл болатын 31 желтоқсан күні «папа, Санта Клаус шынымен бар ма?» деп көзіме ойлы көзбен қарап тұр. Бір мырс етіп «Санта Клаус жоқ, Алла ғана бар» деп өзім сенетін шындықты айттым. Расында да мынау Еуропа Құдайды Санта Клауспен алмастырып, сәбилердің миын улағандықтан, тұтас бір құрлықта «құдайсыздар қоғамы» пайда болды. Енді міне соның тақсыретін тартып жатыр. Еуропаның ауруханалары мына Тәжідертке төтеп бере алмай «морт сынды», әрбір еуропа ауруханаларының жанында ондаған-жүздеген мәйіттерді сасып кетуден сақтайтын бірнеше рефрижаторлар тұр, мәйітхана-крематорийлер 24 сағат бойы тоқтаусыз жұмыс жасағандықтан, ондағы құрал-жабдықтар істен шығып жатыр. Індетке қарсы вакциналар мыңдап егіліп жатса да, адамдар мыңдап өліп жатыр. Өз басым қазақты қырылудан сақтап тұрған «намаз оқып, ораза тұтпаса да Құдайдың бар екенін мойындайтын қасиеті» деп ойлаймын. Аллаға деген сенімдеріңізді жоғалтпаңыздар, көздің қарашығындай сақтаңыздар, сонда ғана аман қаламыз...