Василий Козлов
Ме понда эм еныс
Висьт
Косьтiсьны складын мийö челядь коста радейтлiмö пыр. Öткö, уджавны ковсис ойöн, мöдкö, уджавтöн ештывлiмö неетша орсны – то картiэзöн, то пемытiнас повзьöтчöмöн, то сюас дзебсисьлöмöн; куимöткö, мый только öтамöдлö сэтöн эгö висьтасьлывлö: и анекдоттэз, и серöмтана висьттэз, и повзьöтчана вöвлöммез. Эшö öтiк вöлi, мый кыскывлiс миянöс некокнит удж вылас, – ыджыттэз вöвлывлiсö морт-мöд и видзöтлывлiсö горрез сьöрын да косьтан машинаэз сьöрын, а мийö, челядь, лыддимö асьнымöс ыджыттэзöн и чувствуйтiмö быльнöй ответственность сетöм удж понда.
Кытшöмкö гожум помся ойö сюыс вöлi етша, одз мийö сiйö косьтiмö, кантаритiмö, öшлiмö да тележкаэз вылын кайöтлiм сусеккезö. Ох уж эна тележкаэз! Кыным мортöс нiя гöняйтöтiсö, нельки ыджыттэс радейтлывлiсö пуксьыны ны вылö, а мийö тойлавлiмö – öдззöтчамö да сю кучаас иньдöтамö, а сэтчин мортыс тележка вывсис берездасяс сю вылас. Гаж да серöм!.. И вот сэтшöма орсыштiмö, невна сёйимö-юимö, öтамöдöс потшшуйтiмö, мыйöн вермимö, – а пызанным пыр öтласа вöлi: мый пуктiн, сiйö кöть кин ась сёйö. Сэсся пондiмö висьтасьны быдкодьсö, кин мый тöдiс или кöдö, поди, и бöбöтiс. Горрез дынiсь петicмиян дынö, челядь дынö, Куш Ёгор – старик, кöда нимкодьсö новйöтiс юрситöм юр понда, – вöзйис миянлö конфетаэз: «Сёйö, челядь! Да водö жö, узьыштö. Час-мöд бöртiсюсö, натьтö, ваясö, дак шоччисьтöг ковсяс уджавны». Мийö шуим, что узьны ог вермö и что сякöйсö висьтасикас да кывзiкас и шоччисьыштамö. Сiя водiс миян дын мешöккез вылö: «Но, сэк ме тiянöс кывзышта жö».
Уна мый висьтассис, да только темаыс миян кыдзкö бергöтчис енö веритöмланьö. Нельки спор лэбтiсис: «Еныс эм!», «Еныс абу!», «Мыйкö сёроно эм!» и сiдз одзлань. Видзöтiс кыв пессьöм выланым Куш Ёгор да шыннялiс. Мийö сы дынö: «Дед Ёгор, эм эдö еныс?» И Ёгор шуис: «Кыдз тiянлö висьтавны? Шуа «эм», а начальство кылас, менö видны пондас – мыйö челядьсö велöтан? Шуа «абу» – лоас, бöбöтча, сiдз кыдз енас ачым верита. Шуа сiдз: ме тiянлö висьтася, мыйсянь енас веритны пондi, а выводдэсö быдыс ась ачыс керö. Только, чур, кывзыны – менö не орöтлыны. А то ог понды висьтасьны нем». Мийö чуть не хорöн висьталiмö, что мешайтны огö пондö, кывзамö бура. И дед Ёгор пондöтчис.
…Сорок третьöй год ни вöлi, кöр менö босьтiсö фронт вылö. Одзжык размöд корси, да военкоматсис нёштöм кыввезöн юралiсьыс бергöтлывлiс: тэтöг пö эстöн корсиссес тыр, а тэ зырымтö пö мун чышкыны велöтчы, вояка. Но и тырис кöр даскыкьямысö, повестка локтiс чожа – радуйтчи нельки, а мамö бöбöлöн шуис да герьявны кутчисис. А военкоматас локтi, пыри повтöг ни – мыся, часöт ме веськыта ни понда видзöтны юралiсьыслö синнэзас, оз ни, мыся, бергöтны вермы да эшö видны. А юралö сэтчин мöдiк ни – одззасясö пö фронт вылö ыстöмась, дыр пö öддьöн корсьöм. Вежöртана меным сэк лоис, мыля сiя ме вылö да ме коддес вылö лöг пыр вöвлi да гортö видчöмöн бергöтлывлiс.
И сюри ме Западнöй фронт вылö. Сэк наступленнё ни вöлi. Сьöкытöсь вöлiсö бойес. Перво полöм öддьöн петiс, что виясö. Сэсся пондiповны сыись, что не виясö, а калекаöн кольчча, - сымда адззылiсинтöм-пельтöммесö, пöвкокаэсö да коктöммесö, китöммесö, сотчöммесö да и умöльжыккесö. Не, бой коста эг пов. А вот бой одзын кöть кытчö воштiсь – бöра полöмö вермö. Видзси, конечно, некин эз вежöрт, что пола. А аслым эд недолыт. И вот наступленнё вöлi. Уна неыджыт каррезiсь да посаддэзiсь немчурасö вашöтiмö. И вот вуджимö юок, Болваöн шусьö – тöдвылам пыр сiя, миян юэзлöн ниммез вылö вачкисьö да. И кытшöмкö деревня учöт. Пыримö деревняас – некин абу. Керкуэзö пыралiмö, сарайезын видзöтiмö, нельки гуэзын – абу некин. Пышшисö я отирыс, кöр немеццес пышшыны пондiсö, вийисö я нiйö быдöннысö, ыстiсö я кытчöкö – ог тöд. Шоччисимö недырик да и – приказ одзлань сетiсö мунны. Öксимö, мунамö улицаöт, медбöрья керкусö ни мунiмö. И вот бытьтö кинкö ме вылö видзöтö и сё, дзар кери керкуланяс – и усис синам мята öшын увтсис. А мятасö ме öддьöн радейтлiда и öнöдз радейта. И вот юаси летны турунсö и котöртiкерку дынас. Летiбыдса корось – пригодитчас, мыся, быдöнныс понда. Бергöтчи вороткалань – одзам пöрись инька сулалö, оз вöрöтчы, ме вылö видзöтö небыт синнэзöн. А синнэс ваöсьöсь. Дыркодь видзöтiме сы вылö барöтöм синнэзöн, нельки полöм кытшöмкö вöлi– некин эз вöв и на тэныт, кытiсь и мыччисис. И коккезö дзик тöрмисö, вöрзьöтчыны ог вермы. А пöрись инька ачыс сибöтчис дынöдззам, босьтiс веськыт киöс (шульганам мята коросьсö видзи) и мыйкö пуктiс долоням. Эшö видзöтiс синнэзам да шуис: «Эн пов немись. Этö еноксö дынат пыр видз. Сiя тэнö дорьяс. Не ранаись, не вийöмись эн пов. Немись эн пов». И иньдöтчис грядланьö, кöда дынын ме неважын вöлi. Недыр мыйись ловзи дзик да бергöтчи, а некинöс эг казяв. Эшö эд керкусö кытшöвтi, огоречланьсö видзöтi– не, некин некытöн эз вöв. И котöрöн – ылö ни ёрттэзö мунiсö. Эшö неöтпыр, кытчöдз, деревняыс эз сайöвтчы, бергöтчывлi, а эг некинöс казяв.
И вот веритан, он: полöмö кытчö и öшис. И бой одзас, и бой костас некöр эг пов. И сэтшöмöсь бойес вöвлiсö, что ловйöн етша кольччывлiсö, а менö не эз ранитлы, не эз вий. Боксим виясö, мöд боксим виясö, граната кынымись матын-матын взрывайтчывлiс, а меным нем абу. И видзи ме этö енок-козинсö морос бердам пыр. И öнöдз гортын сiйö видза. Да бур кылöн касьтывла сiйö пöрись иньсö. Кин сiя вöлi: морт ли, эшö кинкö ли? А только енас сэксянь и пондiверитны. И некытшöм коммунист или атеист меным не указ сэтöн. Ме понда эм еныс.
Вот, челядь, менам сiдз. И тiян асмоза быдлöн лоас. Кадыс мыччалас…
Куш Ёгорлöн висьтассис. И сэк жö пондiс кывны машиналöн шы – вайисö сю. «Но, челядь, удж бердö бöра кутчисямö. Вон, машинаыслöн моторыс мырсьö сьöкыт увтас, шуö: ректiся бы. Отсаламö сылö. Да и тiян ки-кокныт весь овны мыдзис». И иньдöтчис горрезланьö…
Унаись Куш Ёгорсö тшöктiмö мийö эшö мыйкö висьтасьны аслас оланiсь, медодз война костасяö, да только шы сэсся сiя эз сет некöр. Да и не клубö, не школаö эз ветлывлы, кöр быдкодь вежалуннэз вылö да пантасьöммез вылö рочавлiсö. Шувлiс, что сытöг висьтасиссес адззисясö.