Василий Козлов
Чожа пемдыны пондас
Висьт.
1
- Мари! Мари!
- Мый горöтан? Сотчö, я мый я, кинкö?
- Мари! Мамыт бöра вон миянлö пантасис – кайö Кольöм керöс вылас.
- Бур, что висьталiн! Кöр и петны ештöм бöра. Да вакрамеш ни сыкöт, нерадсялi ни. Мый инö керны меным сыкöт? – петiс посöдзö Мари да пуксис лабичö.
- А мый тэ сыкöт керан? Пöрись эм пöрись. Ылавлыны пондiс да, шуан. Дак, поди, миянöс быдöннымöс сэтшöм кадыс пöрисьувьяным видзчисьö, – жалейтöм пыр баитö Марикöт Нюра. – Кин тöдö, кытшöмöсь мийö лоамö, сымда воэсö оламö дак. Да миянлö и не овны сэтчöдз.
- Меным точно не овны. Менчим эд сiя нерваэсö сымда ни сёйис, терпеннё эд абу ни. Да и отирыс одзын стыд. Шуöны, натьтö, мамыс сьöрын дозирайтны оз вермы. Да и Алексейыс неöтпыр ни шуис сетны стардомас. Шуö, оз понды терпитны дырсö.
- Ой, мый баитан! – Нюра нельки чепöссис местасис. - Тэнат эд сiя мам! Сiя ассис мамсö оз бы сет стардомас?
- Дак сылöн не миянкöт олö да. Кыдз олö да мый керö, тасянь оз тыдав. А эта эд син одзаным пыр.
- Дак мыйкö разь умöльсö керö мамыт керкуас? Увтас, некö, оз лэдз, öтöрасьны петö ачыс. Дук сы дынсянь оз нöбöт. Да и чöлiсь сiя тэнат, оз бурчит, кыдз мукöдыс.
- Мый абу, сiя абу. Эта пышшалöмыс сылöн раздражайтö Алексейсö. Сылö кажитчö, что отирыс сiйö осудитöны тёщаыс понда да быдкодьсö баитöны.
- Отир не ен. Уна тöдö отирыс? А Алексейыт ась терпеннёсö öктö, - бöра баитö Нюра. – А кытчö пышшывлö мамыт? Ылö кытчöкö?
- Да оз. Вот Кольöм керöс вылас и кайö.
- Да сiя разь пышшöм лоö? Ме чайтi, вöрö мунö, туй вылöт одзлань, мöдiк деревняö инмö. Кытшöм сэк шог! Но каяс Кольöм керöс вылас – тöдан эд, кытiсь кошшыны, лэдзчöтатö.
Мари чеччис, чышкис синваэсö:
- Ладно, Нюра! Кая, лэдзчöта.
- А важын ни пондiс сэтчин кайлывлыны?
- Да вот мöдiк тöлiсь ни. Тулысшöрсянь. Лым не лым, нять не нять - галошижуггесö кышалас да и пöльтö, медбöрын кык бедьöн ни.
- Но, а тэ юасин, мыйла кайö сэтчинö? Мый пö кошшö?
- Дак шы оз сет да. Юаси размöд. Висьталас только: ачым тöда. И сё.
И Нюра шуис:
- Мари, давай ме кайла да лэдзчöта мамтö. А туй костас баита сыкöт. Поди, висьтасяс меным, мыля мунö гортсис.
- Недолыт меным. Аслым жö бы колö.
- Эн переживайт. Мун ештöтчы. А ме лэдзчöта.
2
- Лиза, тэ, я мый я, эстöн сулалан? А ме гадайта: кин инö этчö сувтöм? Богата овны пондан: эг эд тöд. Здорово, Лиза!
- Здорово, здорово, Нюра! Ло здоровöн! – горöтчис паныт старуха.
- Мыйкö ылö тай беддезыт нуöтöмась тэнö. Тшак-ягöдыс абу эшö. Нять только туй вылас. Кыдз инö эн сибды керöс увтас?
- Ой, Нюра! Öтiк бедьнам эг сибдывлы, дак кыкнас мыля понда сибдыны. Видзöт: не беддез, а вöввез. Дзик и не подöн мунi, - кужис серöмтöтны Нюрасö Лиза.
- Лок жö гортö лэдчам. Рыт ни чожа. Мариыт тöждö тэ понда: кытчö пö бöра мунiс öтнас? А тэ он и висьтась, мунан кытчöкö.
- Да кытчö муна? Этчöдз и локта только. Нiя эд тöдöны, что татöн ме. Кошшö менö, бытьтö. Ась оз кошшы, локта ачым.
Нюра босьтiс Лизалiсь öтiк кисис бедь, кутiс киподувтас да шуис:
- Но, лэдзчам-ко, нывка, гортö. Тэрмасьтöг.
Лиза кывзiсис:
-Лок инö, лэдзчам. Зятьö бöра эд пондас Марисö ме пондаись видны. Жаль Мариö.
- Но, жаль дак, мыйла сэк татчö каян пыр?
- Пантала бы ме.
- Кинöс бы тэ и панталан? Поди, кытшöмкö старичоккöт пантасьлан да? – серöм пыр Нюра мöдiс тöдны унажык.
- Ог пантасьлы. А пантала бы. Старичокöс. Ассим. Только сiя абу пöрись. Том.
Нюра дзар керис Лиза вылö и тöдвылас усис Мариыслöн да отирыслöн сёрни, что Лизаыс ылавлö. И жагöн шуис паныт:
- Эн баит, кöдö оз ков. Сiдз разь овлö: старичок, а том?
- Овлö, нывка, овлö. Кöркö висьтася. Талун ог. Тэ вот баитан мекöт бура, бöбöлас он пукты. Тэныт и висьтася. Ашын. Тэ вежöртан.
Джын час бöртi инькаэз вöлiсö Мари одзын. Нюра казялiс, что Мари мöдö видны мамсö, да öлiс сiйö. Мари эз видчы, шуис только: «Мам, пыр ни мун гортö. Чожа пемдыны пондас».
Лиза макнитiс Нюралö кинас да кайис жагöн посöдзö, ныр увтас гусьöн шувлiс: «Чожа пемдыны пондас. Чожа пемдыны пондас».
А Нюра висьталiс Марилö: «Эн вид тэ сiйö. И асьтö эн нервируйт. Абу сiя бöбöв. Быдöс вежöртö. Только сайöвтö мыйкö. Юрас сылöн дума кытшöмкö. Ашын мöдiс висьтасьны».
3
- Но, Лиза, тэнат и вын: быд лунö Кольöм керöс вылас каян подöн. А ме дак öдва талун кайи, тöн эшö мыдзи. Видзöт: тожо эд вöв медалi, только кузьöлö босьтсьöма, - баитiс Нюра Лизакöт, ачыс мыччалiс бедь вылö. Лиза сулалiс чöлöмöн, видзöтiс туй ылынас да шы эз сет.
- Лиза! Ме эд не весь кайи: тэ висьтасьны меным мыйкö важнöйö мöдiн. Сiдзкö чöвны он понды, да и гортлань кад ни: чожа пемдыны пондас.
Нюра бытьтö саймис эна кыввезсянь:
- Чожа пемдыны пондас, сiдз. Чожа ни. Лок инö лэдзчам. Верзьöмöн лэдзчамö.
- Лок. А ме эшö сьывны талун кутчися. Мыйкö одзжык часто сьывлывлiмö, а öнi – кыдз сьыланкылас: «Один раз в год цветы цветут». Öксьывламö нельки шоча, бытьтö оламö не öтiк деревняын. Вот олан лоис! Гортын пукалöны отирыс, телевизоркöт ёртасьöны. Челядь и то озö котрасьö рытнас. А чожа и ваясьны дугдасö.
Лиза беддясис ордчöн, сэсся сувтчис:
- Сё, норасьöв керин? Öнi сьыв! Тэ эд сьывны мöдiн! Ме стрась радейта, кыдз тэ сьылан!
И Нюра кутчисис нюжöтны сьыланкыв. Лиза кöд пораö пондылiс сьывны жö, да сьöкыт вöлi сьывны мунiкас. Деревняö пырисö, а пантасиссез юасьöны: «Мый талун, инькаэз, юитö? Öддьöн ни ылöдз сьылöмныт кылö?» А Нюра шуис: «Кыдз веськыта ыста да веськытжыка кöста! Кодöсь! Кыдз и велалiсö баитны сiдз? Разь кодувья сьылöны только? Бöбöв юррез тiйö! Вот и сьывны ни оз туй – кодöн шуасö. Эх, отир!» Макнитiс отирлань да иньдöтчис кольлавны Лизасö гортöдззас.
- Лиза, тэ жö меным мыйкö висьтасьны талун мöдiн. Вунöтчин ни?
- Ме мыля вунöтча? Эг. Ачыт эд – то сьылан, то отирыскöт видчан. Меным кöр висьтасьны?
- Но, вот часöт горт дынат пуксямö лабичö, да и висьтасян.
- Нюра, ог талун нем висьтась. Ашын.
- Тэ, старуха, бöбöтлан менö, я мый я? Или гленитчис мекöт ветлöтны, гажажык керöс вывсис лэдзчыны, натьтö?
- Ачыт эд каян. Ме ог кор. Ашын висьтася – ог бöбöт.
- Ладно, Лиза. Ме ог тэрмöт. Да и эн висьтась нем, сьöкыт дак. Ме эд серала жö. Но, пыр гортат, а то чожа пемдыны пондас, - висьталiс Нюра да горöтiс: - Мари, пантав мамтö! Сьывтöн талун локтiмö!
Лиза жагöн кайис посöдзöт и шувлiс кыввез: «Чожа пемдыны пондас. Чожа пемдыны пондас».
4
- Эн тэрмöт менö лэдзчыны гортö талун. Мый висьтасьны мöдi, эстöн сiйö висьтася, – одзлань шуис Лиза Нюралö, кöр мöдыс сибöтчис сы дынö.
- Но, ачыт тöдан. Висьтась, кытöн буржык тэныт.
- Нюра, эта керöсным тöдан, мыля сiдз шусьö?
- Мыйкö кывлi. А мыля юасян?
- Керöссö пöриссес нимтöмась сiдз сiйöн, что эта керöсöдз мийö пыр кольлаламö: гöсьöс ли, новобранечöс ли, кулöмöс ли, война вылö ли. Дона миян понда отир кольöны миянöс эта керöс вылын. Вежöртiн?
Нюра видзöтiс Лиза вылö да шуис:
- Вежöртi. Ме учöт вöлi, кöр тятюö да дядяö мöдiк мужиккезкöт да зонкаэзкöт война вылас мунiсö. Эта керöс вылын, натьтö, синваэзсянь гöппез лоисö – сiдз инькаэс герьялiсö.
- Вöтаси ме, Нюра, Öндрейöс ассим. Сё сэтшöм жö том да басöк, кытшöм вöлi сэк, война вылас мунiкас. Нельки йöрнöсыс вывтас сiя жö. Юаси: кытöн инö сибдiн, мыля гортö он лок? А сiя: локта, локта, пантав. Да содтiс: чожа пемдыны пондас. Вот ме и пондi этчö кайлывлыны, пантавны пемыт одзас. Да сё весись кайлывла. А нылö зятьöкöт менö бöбöлöн да ылöсiсь петöмöн шуны пондiсö.
Висьтасис старуха да горзыны пондiс. Пуксьыны пондöтчöм шондiлöн югöррез увтын синваэс вöлiсö дзик биоккез, кöдна медбöрья вынiсь эшö видзöны асаныс югытсö да шонытсö.
Нюра шы эз сет. Кутiс кипод увтö Лизасö, да иньдöтчисö инькаэз гортланьö. Лэдзчисö чöлöмöн. Мукöдпыр только ойзывлiсö да ышловзисьлiсö. Сувтчылiсö размöд, видзöтыштлiсö Кольöм керöсланьö: некин оз тыдав. Да бöра жагöник гортланьö.
Мари петöм öтöрö пантавны ни, эз ли пö мыйкö ло. Лиза малыштiс Нюралiсь юрсö, чуть серöмтчыштiс, шуис: «Спасибо тэныт! Простит менö!» Бергöтчис да шуис Марилö: «Чожа пемдыны пондас. Чожа пемдыны пондас. Да и пемдас». И кайис жагвыв посöдзö. Нюра синва пыр видзöтiс, кыдз пырис Лиза, и шуис гусьöн: «Чожа пемдыны пондас. И пемдас. И Öндрейтö панталан. Простит менö!..»
5
Ойнас Лиза кулiс. Нюра отсалiс миссьöтны, пасьтöтны да водтöтны Лизасö. Кыдз и пыр, кольлалiс быдсöн деревняыс пöрисьсö Кольöм керöсöдз. Куйлiс гробас Лиза бытьтö рад чужöмöн. Нюра вежöртiс: Öндрейыс локтiс аслас Лиза дынö, пантасисö Кольöм керöс вылас, колисö керöссö радöн. И отирсö. И лоис Нюралö сэтшöм зубыт, что горöтöмöн пондiс герьявны. Отир шуисö: нылыс пö кынымкö синва кисьтiс мамыс понда, а Нюраыс вон кыдз бöрдö. Эзö нiя вежöртны вермö, кытшöм сьöкыт оланыс вöлi Лизалöн, кöр похоронкаыс жöникыс йылiсь локтiс, кыдз сьöкыт вöлi челядьсö быдтыны. Да и не только Лизалö. Уна инькалiсь деревняас асывнас пидзыртны позис юрöдзнысö синвасянь. Уналöн сэк пемдiс оланыс.