Василий Козлов
42-öй размера прокладкаэз
(юмореска)
Öтік арся лунö öксьöмась черикыйиссез да мунöмась Кама вылö. Чериалыштöмась недыр да пуксьöмась пажнайтны. Санколöн коккес кынмыны пондöмась, и сія чöвтöм сапоггесö, нюжöтöм коккесö биланьö да пондöм норасьны: «Коккезö пыр сідз вазьöны, кöть мый кер. Тіян озö, ли мый ли, вазьö?» И висьталöмась мужиккес, что велалöмась нія инька прокладкаэз сапог пыдöссэзаныс пуктывлыны − прокладкаэзыс люзьсö асаныс кыскöны, а коккез кöсöсь кольччöны.
Санко кывлöм телерекламаись инька прокладкаэз йылісь. Да и только. И вот мунöм сія аптекаö небны колана товар.
− Вузалö меным сорок вторöй размера прокладкаэз, − шуöм сія аптекаись уджалісьлö. Уджалісьыс абу вежöртöм да юалöм, мый пö колö. Санко и шуöм бöра:
− Сорок вторöй размера прокладкаэз.
Уджалісь бöра абу вежöртöм да эшö юалöм, мый колö. Нылісь сёрни пондöмась кывзыны аптекаись быдöс уджаліссез да босьтасиссез. Санко чайтöм, что уджалісьыс, поди, оз и тöд сэтшöм товарыс йылісь, да пондöм баитны сідз:
− Телевизорын рекламируйтöны инькаэз понда прокладкаэз. Тійö кывліт кöть прокладкаэс йылісь?
− Да невночки кывлі,− жагвыв шуöм уджалісь, ачыс öдва серöмсö сайöвтöм.
− Тіян эмöсь инькаэз понда прокладкаэз? − юалöм бöра Санко.
− Эмöсь,− паныт кылöм кыв.
− Дак вот меным колöны прокладкаэз сорок вторöй размераöсь.
Аптекаын кынымкö кадчир сулалöм лöнь. Сэсся лэбтісьöм сэтшöм сералöм, что нельки стеклоэз пондöмась дрöжитны. А аптекаись уджалісь, кöдылісь Санко корис прокладкаэсö, нельки сералöмувьяс садьтöмсялöм да лэдзчисьöм джоджö. Дыр серöлöмась отир, а Санко сулалöм да абу вермöм вежöртны, мый вылын нія сералöны. Сэсся öтік мужик юалöм Санколісь:
− Тэ кытшöм местö прокладкаэсö мöдан лöсьöтны?
Эта бöрсянь сералöмыс отирлöн эшö вынажык лоöм, дзик гымавны пондöм. Санко видзчисьöм, видзчисьöм, кöр отирыс невна успокоитчасö, да и ответитöм мужикыслö:
− Мый сералат, од коли вежöртö? Ме сапоггезам нійö сюя.
И виль сералöм чанöтöм аптекасö. А Санко чуньнас мыччалöм отирлö, что нія бöбöлöсь, да и гордöя петöм öтöрö.