Василий Козлов
Суперповар
(юмореска)
Корöм Степаника кинлiськö чайнöй гриб – ваыс веськöтчан пö сылöн, да и юан туйö пö сiдзжö вермас лоны, эд ырöшсö вунöтчисö ни, а куш ванас он пöт. Степан юалöм жö, кытшöм нильыг блиннэз иньыс банкаас пондiс вöдитны, а кöр кылiс «чайнöй гриб» да мый сiйöн керöны, кинас макнитiс: «Вот нельки сэтшöмнас эшö эн веськöтчывлы. Мый кытöн кинлiсь и кылас – колö ас вывтас пешлыны. Поди, öнджа – отрава. Здокнитан эшö, а виноватöйнас менö шуасö». Иньыс и шуöм только: «Да кинлö тэ колан! Эн лёб, он вежöрт дак!» Эрзöмась, эрзöмась öтамöд выланыс, кыдз и пыр, да и лöньсьöмась.
Чулалöны луннэз, Степаника видзчисьö, кöр ни туяс юны виль веськöтчансö, содтывлö дозас мыйкö, а Степан серавлö да шуткаэз иньыслань ыставлö: «Чожа миян öнджа лоас – суперблюдо! Суперлекарство! А менам – суперинь!»
Вот кытшöмкö асылö инька вежöртiс, мый васö позьö банкасис босьтны ни, кисьтiс мöдiк дозö. Колiс бы вились вильдыны чайнöй грибсö, да удж вылö тэрмасис ни. Лунсö уджалiс, а рытнас сёрмис гортас локны: Петрикалöн нимлун вöлi, да сы ордö пыралiс. Гортас локтiс сёр рытöн. Эшö посöдзын кылiс кытшöмкö умöль дук, да эз вежöртсьы, мыйöн сiдз нöбöтö. Осьтiс керку ыбöс да ойкнитiс: керкуас кöть чер öшöт – сэтшöм тшын сулалö, а дукыс сэтшöм, бытьтö падина жаритöны. «Степан! Тэ ловья?» - горöтiс. «Ловья!» - тшын пытшкись кывсис паныт кыв да кашляйтöм. «Мый инö керан сэтчин? Мый палитан? Комыс, я мый я, сотчö?» - перыта юасис инька. «Не! Сёян мöдi тай лöсьöтны!» - горöтiс Степан да петiс посöдзö. Киас вöлi сковородка, петкöтiс сiйö öтöрö. Дыр кашляйтiс, сэсся шуис: «Ась, ноко, тшыныс петас». Иньыс петiс сьöрас:
- А мыля сэтшöм дук, кöть кув сысянь? Мый сiдз пуан-сотан?
- Ме локтi гортö. Тэ абу. Кынöмö сималö. Вот и мöдi лöсьöтны мыйкö. То – тшак кутчиси жаритны банкасит.
- Кытшöм тшак? Ме джоджулас эг пырав, некытшöм тшак эг петкöтлы.
- Да банкасит, веськöтчыны кытöн кытшöмкö тшак тай быдтiн. Ачыт эд шуин: гриб.
- Дак тэ сiйö, я мый я, жаритiн! – пондiс серавны Степаника, кок йылас öдва видзсис. Сэсся пуксис поспöв вылö да пондiс ваксьыны. – Бöбöв тэ, дак и бöбöв. Сiя эд чайнöй гриб, не вöрись тшак. Ноко, мыччав, мый аркмис.
Дзарнитiс сковородка вылас: каша – не каша, кисель – не кисель, нильыг, сьöд рöма. И эшö ёнжыка кутiс серöмыс:
- Но, менö сякö сералiн эта гриб понда, а ачыт, тыдалö, ёнжыка шогалöмыт, гыркат кö мöдiн сiйö сюйны. Вот и пöтiн. Мун жö кöтöт дозтö ведраö, да суперблюдотö назём куча вылас кисьтны эн вунöт: гуттэслöн суперпир ашын лоас сы дорын. Ой ни дай ой! Суперповар тэ менам!