Василий Козлов
Куим öткодь
(ыджыттэз понда сценка)
Орсiссез:
Анна
Аннушка
Нюра
Öшын увтын лабич вылын пукалö Анна, беспокойнöя öтмöдöрö нёджжасьö.
АННА. И баитыштны некинкöт! Куим старука деревняаас кольччим. Да и ниммезным öткодьöсь! Вот и олам – куим öткодь – кыдз кужамö! Ой! (Видзöтö шульгаланьö). Кöть бы Аннушка вовлiс, кыв-мöд бы шуис. Кöть бы видчим бöра, сё гажажык. (Видзöтö веськытланьö). Нюра бы кöть бöжсö мыччылiс, серöмтöтiс бы мыйöнкö. Ой-ой-ой! (Сьылö). Мунiс, колис голубöй синока…
Шульгаланьсянь сы дынö локтö-беддясьö Аннушка.
АННУШКА. Чеччин ни, тёза? А ме верзьöмöн тэ дынö бöра!
АННА (нерöмöн моз). Чеччин ни! Ме час ни эстöн пукала, тэнö, ладтöмсö, видзчися!
АННУШКА. Мый тэ менö видзчисян? Ме эг кöсйись, некö, да?
АННА. А мый кöсйисьны! Видзчися и сё! Сёроно нем жö тэныт керны.
АННУШКА (пуксьö бокас). Мыйкö тэ, старука, бöра, тыдалö, затея кытшöмöкö видзан!
АННА. Видза – ог, а тэнö видзчиси. Но тэ не рад, тыдалö, дак тэныт ог и висьтась. Часöт Нюрасö кытсала да сылö висьтася, а тэныт – ог.
АННУШКА. Вот вежöрт тэ этö бöбöвсö. Сэк эн бы и шыась. А то – ог да ог. Мыйлö инö сэк видзчисин?
АННА (видöм мозöн). А тэ мыйлö инö сэк локтiн?
АННУШКА. Да ог и шы ме тэныт сет.
Веськытланьсянь петö да ны одзöт тэрмасьöмöн мунö Нюра, сьöкыта чушыктö. Нюра беддясьö кык бедьöн.
АННУШКА. Нюрка, кытчö тарöвтчан? Вон колёсоыт письтöм, а тэ он и адззы!
НЮРА. (Аннушкалö). А то тэ кытöн! А ме эд тэнö вовсю кошша!
АННУШКА. И тэныт ме ковсьыны пондi? То сизим лун, кöть кув, некинлö ог ков, тö öтдруг быдöнныслö ковся! А тэныт мый месянь колö?
НЮРА. Да вот висьтасьны мöда мыйкö тай!
АННА. Лок, пуксьы бокам. И менам тэныт эм мый висьтасьны. А этакöт (мыччалö Аннушка вылö) талун ме ог баит.
НЮРА. Мый бöра эдö делитö? Лöгасьöмась, видзöт! (Пуксьö Нюра бердö).
АННУШКА (Нюралö). Но висьтась, мый мöдiн. Поди, лыян бöра, а ме, бöбöв, верита!
НЮРА (лöгасьöмöн). Этö кöр ме тэныт лыйлi? Ме ог бöбöтчы!
АННУШКА. Да пыр бöбöтчан. Мый кытiсь кылас, семись содтас, куимись соровтас да миянöс вердас.
НЮРА (эшö лöгжыка). Но, спасибо тэныт! Кужин нагорнитны! Асьтö бы тöдiн! Сё, ме тэкöт тожö сэсся ог баит! (Чеччö да пуксьö Анна бокö).
АННА. Ноко, висьтась, мый мöдiн.
НЮРА. Часöт! (Мыччалö Аннушкалань). Да вон кывзiсьö да!
АННУШКА. Мöдi тай! Баитчö, ме тiянлö ог мешайт!
АННА. Но, висьтав пелям сэк!
Нюра мöдö Анналö пеляс баитны, дыр чöлö сэтшöм позаын.
НЮРА (пуксьö веськыта, гыж-гыж керö юрсö). Баля юр! Вунöтчи!
АННА. Тэ курöг, а не баля! Баляöдззас эшö овны колö!
НЮРА. Этö тэ мый часöт меным висьталiн? Ачыт тэ курöг!
АННА. О, тожö пондöтчис!
НЮРА. Ак тэ сiдз! Сэк ме тэкöт тожö ог понды баитны! (Бергöтчö бöрöн).
Пукалöны чöлöмöн кытшöмкö кад. Öтыс пондöтчылö сьывны; мöдыс боргö ныр увтас; куимöтыс шутнялыштлö да ойзö. Кадiсь кадö видзöтлöны öтамöдныс вылö гусьöн.
АННА (бырсьö терпеннёыс). Тiйö мый, нывкаэз? Натьтö, неладно жö мийö керамö?
АННУШКА. Неладно, нывкаэз!
НЮРА. А ме важын ни тiянлö шутняла, что неладно, а тiйö некыдз одö вежöртö!
И куимнанныс серöмтчисö. Сералöмöн нерисö öтамöднысö, кыдз лöгöдззас локтiсö.
АННУШКА (Анналö). Но, висьтась ни сэк, мый меным мöдiн öнтай.
АННА. Да ме вунöтчи ни, мый мöдi висьтасьны!
И куимнанныс эшö одззася горöнжык пондiсö ваксьыны.
АННУШКА (Нюралö). Но а тэнат, Нюрка, баляыт уськöтiс тöдвылат, мый меным мöдiн висьтасьны?
НЮРА (баля моз бексöмöн). Бе-э-э-э-э! Э-э-эз вермы!
И бöра куимнанныс пондiсö ваксьыны.
АННА. Но и ась тай! Зато пöттöдз ваксим!
АННУШКА. Вот, вот! Видчам да миритчам, уннялам да сералам!
НЮРА (бöра балясö нерöмöн). Бе-э-э-э-э…
Сералöны одзлань.