Сценка «Ачыт керны куж быдöс»
Сценкаын участниккез
Гадалка (кинкö ыджжыттэз коласiсь)
Нёль челядёк
Гадалка. (пасьтасьöм колана моз; босьтöм сьöрас кытшöмкö атрибуттэз,орсö нiйöн)
Челядь, ме гадайтча.
Локтö ме дын татчö.
1 челядёк (юрсиыс öддьöн пашмöм; сибöтчö гадалка дынö)
Чожа меным тэ висьтав:
Менö рака оз кокав?
Гадалка (керö кытшöмкö манипуляцияэз киэзнас)
Вот сынавтöм тэнат юр.
Эта абу эдö бур!
Ракаыс казялас,
Пуксяс да кольттялас.
Тэнат юрыт – ракапоз,
Рака кольттез понда – доз.
1 челядёк
А ме кольттесö вузала,
Сынан неба. Юр сынала. (Мунö гадалка дынiсь гажтöма)
Сибöтчö гадалка дынö 2 челядёк.
2 челядёк
Чожа меным тэ висьтась:
Босьтасö я меным пась?
Гадалка (бöра керö кытшöмкö манипуляцияэз)
Тэнат сапыт тырся-тыр,
Оз чушыкты нельки ныр.
Адзза, мамыт кыдз босьтасьö,
Но тöдвылас абу пасьыс…
Пасьыс оз ло тэныт дыр.
Сап дзимлявны небис зыр.
2 челядёк
Ачым сап понда дзимлявны,
Медбы пась верми пасьтавны. (Мунö гадалка дынiсь гажтöма.)
Сибöтчö гадалка дынö 3 челядёк.
3 челядёк
Айö мунiс магазинö:
Босьтас меным я козиннэз?
Гадалка (бöра керö кытшöмкö манипуляцияэз)
Кытшöм нятьöсь тэнат гыж!
Адзза: тэ тай öддьöн дыш!
И эшö козин видзчисян?
Тэныт только – кушман кыш.
Айлö тэ не отсасись –
Сэк козинсö эн видзчись!
3 челядёк
Талунсянь отсасьны понда:
Лым дзимляла, керку лонта.
Сибöтчö гадалка дынö 4 челядёк.
4 челядёк
Менам баб öддьöн шогалö,
Чожа я сiя веськалас?
Гадалка (кытчöкö дыр видзöтö руас)
Тэ коддесö кошша,
Тэ кодьсö ме ошка:
Не кынöмыт понда тöждан,
А роднöйез понда тöждан.
Баб тэнат веськалас,
Юртö дыр малалас.
Но и бур тэ быдман морт,
Отир шöрын медбур сорт.
Кутö 4-öт челядёксö киöттяс да петкöтö зрителлез одзö. Ордчöн сувтöны 1, 2 да 3 челядёккез.
Гадалка (юасьö челядьлiсь)
Кытшöм мортöн колö лоны,
Медбы отирыслö ковны?
1 челядёк
Чожся-чожыс быдлö ковсьö,
2 челядёк
Дышлö умöля и овсьö.
3 челядёк
Ачыт ас сьöрат видзöт.
4 челядёк
Ачыт, верман мый, миссьöт.
1 челядёк
Ачыт гортын пыр отсась.
2 челядёк
Сэк и лоас тэныт пась,
3 челядёк
И козин, и чöскыт тор.
4 челядёк
Ошкас тэнö сэк быд морт.
Öтлаын:
Ачыт керны куж быдöс.
Сэк оланат лоас дöс.