Василий Козлов.
Ыджыт лун
(вичкуын учöт велöтчиссез понда сценарий)
Орсiccез:
Баитiсь
Лыддьöтiсь
Маша
Настя
Ваня
Сеня
Сцена вылын баитiсь да лыддьöтiсь.
Баитiсь
Бур лун тiянлö, гöссез! Талун луныс нач бур, сiя сетö сымда рад, что сiйö радсö мийö сетамö бы и тiянлö! Еныс радсö козьналiс быдöннымлö!
Лыддьöтiсь
Тöн эшö тöждiсим:
Гажтöм пö олан.
Асывсянь ни эма
Лоöма пызан:
Нянь, кöвдöм да шаньга,
Яя шыд да нöк,
Тшак, ягöд да кольттез,
Ма да чери пöк.
Вичкуланьö мунам –
Талун сэтшöм кад:
Колö аттьö шуны,
Ен что сетiс рад.
Ловзис талун Еныс –
Оз кулöмыс ло!
Рад лоис öтöрыс,
Радмö менам лов!
Баитiсь да лыддьöтiсь сайöвтчöны.
Сцена вылöт мунöны Настя да Сеня. Нылö паныт локтöны Маша да Ваня.
МАША. И кытчö этö тiйö шыбыльтатö асывсянь одзжык?
НАСТЯ. Вичкуö мунамö!
ВАНЯ. И мый сэтчин керны, да эшö асывсянь?
СЕНЯ. Дак эд талун Ыджыт лун. Сiя медъюгыт вежалун миян. Талун Кристосыс ловзис! Он кö вичкуас талун вовлы, сэк , петö, меддона лунсö тэ орддян.
МАША. (Ванялö). Лок, Ваня, и мийö сэк мунамö вичкуас. Ме радейта масiссез тэчны: биоккес нылöн сэтшöм шонытикöсь, дзик ловьяöсь. Кöр масiсьсö ме пукта, пыр меным и рад, и гажтöм невна. А кöр и ыш ловзися.
НАСТЯ. Этö сысянь, что масiсьыс – учöт козин.
МАША. А ыджыт козиныс – мый? Кöр сьöм тырся-тыр сетöны?
СЕНЯ. А ыджыт козиныс – сiя, кöдö Кристосыс быдöс отирлiсь греекез понда сетiс.
ВАНЯ. И мый жö сiя сетiс?
СЕНЯ. Асьсö сетiс, олансö пуктiс. Крест вылын сьöкыт мученнёöн кулiс.
ВАНЯ. А мыйлö сэк вöлi Енöн лоны, сёроно жö вийисö?
НАСТЯ. Этö тэ кыдз морт баитан, а мортыс пыр ассис олансö меддонаöн лыддьö.
СЕНЯ. Вот тiйö пыртöмöсь. Пернаэз вон новьятö. А мыйлö?
МАША. А менам пернаö эшö зарниись, басöк. Тöдат, кытшöм дона!
ВАНЯ. А менö бабö тшöктö новйыны. Баитö, пернатöг мывкыдö лоас умöль, бурöн ог быдмы.
СЕНЯ. А Кристосыс крестсö отир одзын ас вывтас кыскис карсянь вылын керöс вылöдз. И менам вежа Симон сылö отсалiс. А тэнат, Ваню, вежа Иоанн Богослов да тэнат, Маша, вежа Мария Магдалина крест дынас сулалiсö. Сулалiсö да öтлаын Кристосыс мамкöт бöрдiсö.
МАША. Настя, а тэнат вежаыт мый керис?
НАСТЯ. А менам вежа Анастасия сёрöнжык олiс, ассьсö сiдзжö бурöн мыччалiс. Сiя кристианалö уна отсасис, аслас эскöм понда би вылын сотчис. А греческöй кыв вывсянь вуджöтсьö ним «Анастасия» кыдз «ловзьöтöм».
ВАНЯ. Мунамö жö ни вичкуас.
МАША. Мунамö. И масiссезнаным вичку гöгöрöттяс сiдзжö гöгöртамö!
СЕНЯ. Мунамö да ассиным учöт козин Енлö пуктамö.
НАСТЯ. Мунамö! Енсö аттьöаламö да вежалунся радöн козьнасямö.
Лыддьöтiсь
Бур кылыс Енлöн
Шонтö лов!
Ен кывсö кыв,
Ен кылöн ов!
Кристосыс сетö
Рад да шуд!
Тэ сiйö адззы,
Сiйö кут!
Баитiсь
Оланным миян быдкодь сера, быдкодь рöма. Мед пемытыс миянлö эз пантась, медбы пемытас мийö эгö сюрö, колö овны сiдз, медбы мунны югытланьö, медбы уджным да сёрниным вöлiсö югытöсь. Ыджыт лунöн тiянöс, отир, – медъюгыт вежалунöн!