Соли 1914-1916 бо маблағгузории марди ориф Норчабой бунёд ёфтааст. Манора аз ҷониби устоҳои шаҳри Қӯқанд Усто Ҳайдархон ва Усто Камолиддин бо ҳамкории Усто Йулдоши гаҷкори конибодомӣ шудааст. Баландии манора 24 метр, қутраш 4,2 метр буда, аз 6 қисм иборат буд. Барои таҳкурсии манора хандақи 6-7 метра сохта шуда, ба зери он санги хоро, чӯбҳои заранг, арча ва тут хобонида шуда, ба ҳамдигар васл карда шудаанд. Байни чӯбҳо бо оҳаксангу рег маҳкам карда шудааст. Дар дохили манора 85 зинаи морпеч, даричаҳо сохта шудааст. Манорае аз хишти пухтаи суфтакардашуда бо услуби манорасозии асрҳои 11-12 сохта шуда, барои азонгӯӣ ва ба сифати дидбонгоҳӣ ва нишони роҳ истифода мешуд.
Соли 1935 баъзе тангназарон манораро вайрон карданӣ буданд. Хушбахтона, раиси шаҳри ҳамонвақта Амирбек Қиёмбекови Бадахшонӣ манораро аз вайроншавӣ нигаҳ дошт.
Солҳои 1991-1994 кулолгари номӣ Бобоҷон Мавлонов бо писараш Тӯрабой онро 7 метр баланд бардошта, навсозӣ намуданд.
Ёдгорӣ дар муҳофизати давлат қарор дошта, яке аз ёдгориҳои қадимаи таърихию меъморӣ маҳсуб ёфта, дорои аҳамияти ҷумҳуриявӣ мебошад.