Лідар ліберальнай польскай партыі “Вясна”, еўрадэпутат Роберт Бедрань стаў кіраўніком дэлегацыі Еўрапарламента ў справах Беларусі. Дэлегацыя распачне працу ў канцы лістапада.
Заяўляючы кандыдатуру Бедраня, еўрадэпутат і лідар польскіх сацыялдэмакратаў Лешак Мілер выказаў упэўненасць, што ён мае найлепшыя якасці для гэтай пасады. Ці так гэта? Мы сабралі пяць фактаў пра Бедраня і… здаецца, Аляксандру Лукашэнку ён не спадабаецца.
1. Атэіст
“Вясна” — новая партыя. Яе афіцыйная прэзентацыя адбылася толькі сёлета. У ліберальны парадак дня, які прасоўвае Бедрань, уключанае абмежаванне ролі каталіцкай царквы ў польскай палітыцы і большае раздзяленне Касцёла і дзяржавы. Таксама палітык прапануе лібералізацыю закона супраць абортаў. Усё гэта вельмі разыходзіцца з парадкам дня, які прапануе палякам кансерватыўная кіруючая партыя “Права і справядлівасць”.
2. Адкрыты гей
Роберт Бедрань — адкрыты гей, які ўжо шмат гадоў жыве ў шлюбе і выступае за легалізацыю аднаполых шлюбаў у Польшчы. На радзіме палітык цярпеў пераслед і нават быў збіты на глебе гамафобіі. У Беларусі прадстаўнікоў ЛГБТ-супольнасці таксама збіваюць на вуліцах, яны знаходзяцца пад ідэалагічным ціскам. Гамафобныя выказванні ў розны час дазвалялі сабе кіраўнік краіны Аляксандр Лукашэнка і экс-міністр унутраных спраў Ігар Шуневіч.
3. Ведае пра парушэнні правоў чалавека ў Беларусі
“Захаванне правоў чалавека ў Беларусі — ключавое пытанне”, — сказаў Бедрань адразу пасля абрання кіраўніком дэлегацыі Еўрапарламента па справах Беларусі.
4. Калі быў мэрам, ездзіў на ровары
У 2014 годзе Бедрань выйграў выбары мэра ў горадзе Слупску на поўначы Польшчы, набраўшы 57% галасоў. Сваю кампанію палітык пабудаваў на тым, што ён “не тутэйшы” — то-бок не мае ў рэгіёне карупцыйных сувязяў. На пасадзе мэра Бедрань адмовіўся ад службовага аўтамабіля і пазбавіў работнікаў ратушы даплат на бензін, а фінансавую справаздачнасць муніцыпалітэта стаў публікаваць на сваёй старонцы ў “Фэйсбуку”.
5. Кар'еру больш звязвае з Бруселем, чым з Варшавай
Так кажуць у тым ліку і таму, што Бедрань узначаліў дэлегацыю Еўрапарламента па справах Беларусі. Але ёсць у Польшчы і сілы, якія бачаць у 43-гадовым Бедраню рэальнага кандыдата на пасаду прэзідэнта краіны. Выбары пройдуць у 2020 годзе.
Цяпер Еўрапарламент не падтрымлівае афіцыйных стасункаў з парламентам Беларусі, але там спадзяюцца, што пасля лістападаўскіх выбараў у нашай краіне ўзаемадзеянне адновіцца.