Старадаўнія назвы (тапонімы) на тэрыторыі сучаснага Светлагорскага раёна.
Ваколіца Шацілкі – вёска, у якой жыла пераважна шляхта, пазней частка Шацілак. Вядома з XIX cт. У пачатку ХХ ст. - усходняя частка Шацілак. Зараз у межах горада Светлагорска.
Ваколіца Шацілкі знаходзілася ў межах ракі Бярэзіны на ўсход ад мемарыяльнага комплексу Звон-набат да Светлагорскай ЦЭЦ і да сучаснай вуліцы Інтэрнацыянальная.
Крыніцы:
1. Рассадзін С.Я. Шацілінскі востраў// Археалогія Беларусі:Энцыклапедыя ў 2 тт. Т.2. Мн,2011. - с.417
Цытата: "Сядзіба 16-17 стст. была папярэдніцай шляхецкай ваколіцы, а потым і мястэчка Шацілкі, паздней гарадскога пасёлка, перайменаванага ў 1961 г. ў г. Светлагорск".
2. НГАРБ. – Фонд 2001. – Воп. 2. – Спр. 1. – Арк. 35.
Цытата за 1863 г.: «Ваколіца Шацілкі, у якой каля 200 душ шляхты, у Рэчыцкім павеце, у 3-х вярстах ад мяжы Рагачоўскага павету, там ёсць касцёл і ксёндз, ураджэнец той жа ваколіцы Манкевіч, шляхта там католікі даволі развітыя» (Звесткі выявіла Марыся Булавінская, студэнтка гістарычнага факультэта БДУ.).
3. Рассадзін С. Аб пісьмовых крыніцах пра гістарычныя пачаткі сучаснага Светлагорска // Шацілкаўскія чытанні: матэрыялы ІІ гісторыка-краязнаўчай канферэнцыі (да 450-годдзя Шацілак) у Светлагорску, 16 красавіка 2010 г. — Светлагорск, 2011, с. 23—37
Цытата: «Сельсавет аб'ядноўвае 6 населеных пунктаў, якія размешчаны наступным чынам: 1) ваколіца Шацілкі (польскае насельніцтва), 2) мястэчка Шацілкі (яўрэйскае насельніцтва). Абодва населеныя пункты фактычна складаюць адзін, але адрозніваюцца толькі тым, што ў адной частцы Шацілак пражываюць яўрэі, якія займаюцца ў большасці гандлем, у сілу чаго гэтая частка Шацілак з'яўляецца мястэчкам. Другая частка населенага пункта Шацілак, у якой пражывае выключна польскае насельніцтва, якое займаецца сельскай гаспадаркай, носіць назву Ваколіца – Шацілкі.»
4. Мапа Расійскай імперыі 1866 года, трохвярстоўка, на якой можна пабачыць Ваколіцу Шацілкі.
Крыніцы і тапонімы адшукаў Віктар Раманцоў.
Заканадаўства, якое дазваляе вярнуць старадаўнія назвы (тапонімы), якія існавалі на тэрыторыі сучаснага Светлагорскага раёна:
Артыкул 54 Канстытуцыі Рэспублікі Беларусь: “Кожны абавязаны берагчы гісторыка-культурную, духоўную спадчыну і іншыя нацыянальныя каштоўнасці”.
Артыкул 15. Дзяржава адказная за захаванне гісторыка-культурнай спадчыны...
Артыкул 16, пункт 4, частка 2 Закон РБ “Аб найменнях геаграфічных аб’ектаў” ад 16.11.2010 года
4. Переименование географических объектов допускается:
при необходимости возвращения отдельным географическим объектам их исторических наименований.