Старадаўнія назвы (тапонімы) на тэрыторыі сучаснага Светлагорскага раёна.
Шацілінскі Востраў – маёнтак, старадаўняя частка Шацілавіч (Шацілак). Зараз у межах горада Светлагорска ўзвышша паміж ракой Бярэзінай і халодным каналам, з якога бярэ ваду Светлагорская ЦЭЦ. Вядомы з 1560 г.
Упершыню пісьмова згадваецца ў прывілеі Вялікага князя літоўскага і караля Польскага Жыгімонта II Аўгуста ад 15 ліпеня 1560 года. У дакуменце сказана, што маёнтак Шацілінскі Востраў, “размешчаны на гары, на тракце Горвальскім, на рацэ Бярэзіне”. Пасля смерці папярэдняга ўладальніка, Рамана Шацілы, маёнтак быў перададзены зямяніну Ждану Манкевічу з абавязкам выканання вайсковай службы. Арыгінал прывілея не захаваўся. У 1798 годзе з яго была зроблена копія на польскай мове, якая зараз захоўваецца ў Нацыянальным гістарычным архіве Рэспублікі Беларусь у актавай кнізе Мінскага земскага павятовага суда.
Крыніцы:
1. Копія прывілея Вялікага князя літоўскага і караля Польскага Жыгімонта II Аўгуста ад 15 ліпеня 1560 года // НГАБ. Ф. 686. Воп. 1. Спр. 9. Арк. 86-88 адв.
2. Рассадзін С. Аб пісьмовых крыніцах пра гістарычныя пачаткі сучаснага Светлагорска // Шацілкаўскія чытанні: матэрыялы ІІ гісторыка-краязнаўчай канферэнцыі (да 450-годдзя Шацілак) у Светлагорску, 16 красавіка 2010 г. — Светлагорск, 2011, с. 23—37
3. Маслюкоў Т. Узнікненне Шацілак. Шацілы і Манкевічы – старажытныя шляхецкія роды Беларусі / Памяць: Светлагорск і Светлагорскі раён. Гісторыка-дакументальныя хронікі гарадоў і раёнаў Беларусі. У 2-х кн. Кн.1. Мн. 2000. С. 47-49.
4. Маслюкоў Т. Колькі гадоў Светлагорску? Новыя даныя аб часе ўзнікнення Шацілак // Светлагорскія навіны. 1990. 19 мая. С. 2.
5. Рогалеў А. Колькі гадоў Светлагорску? / Сцежкі ў даўніну. Мн. 1992. С. 126-130.
Адшукаў крыніцы Віктар РАМАНЦОЎ.
Заканадаўства, якое дазваляе вярнуць старадаўнія назвы (тапонімы), якія існавалі на тэрыторыі сучаснага Светлагорскага раёна:
Артыкул 54 Канстытуцыі Рэспублікі Беларусь: “Кожны абавязаны берагчы гісторыка-культурную, духоўную спадчыну і іншыя нацыянальныя каштоўнасці”.
Артыкул 15. Дзяржава адказная за захаванне гісторыка-культурнай спадчыны...
Артыкул 16, пункт 4, частка 2 Закон РБ “Аб найменнях геаграфічных аб’ектаў” ад 16.11.2010 года
4. Переименование географических объектов допускается:
при необходимости возвращения отдельным географическим объектам их исторических наименований.