Aziz bekajonlar e'tiboringizga juda ham mazali taom retseptini taqdim etaman. Pomidorli qayla bilan tayyorlangan teftellar bu ko’pchilik sevib iste’mol qiladigan taomlardan biridir. Shuningdek, uning tayyorlanish jarayoni juda ham oson bo’lib, bunda hech qanday qiyinchilikka uchramaysiz. Bundan tashqari, siz bu taomdan ko’proq tayyorlab, yarmini pishirishingiz, yarmini esa muzlatib, keyingi safarga olib qo’yishingiz ham mumkin.
Kerakli masalliqlar:
- 240 gramm qo'y go'shti qiymasi
- 30 gramm piyoz
- 10 gramm kashnich
- ta'bga ko'ra tuz va murch
- 60 gramm o'z sharbatida tayyorlangan pomidor
- 60 gramm pomidor
- ta'bga ko'ra rayhon, paprika va koriandr ziravorlari
- 20 gramm smetana
- 10 gramm zaytun yog'i
Tayyorlash usuli:
1. Tog'orachada go'sht qiymasi, mayda to'rg'algan piyoz, kashnich, tuz va murchni birlashtiring. Yaxshilab aralashtiring.
2. Tayyorlangan qiymani 4 qismga bo'lib, teftellarni shakllantiring. Pergamant qog'ozi yozilgan qolipga tering.
3. O'rta darajada qizdirilgan pechda, 7-8 daqiqa davomida pishiring.
4. Pomidorli qayla uchun: o'z sharbatida tayyorlangan pomidor va pomidorni mayda to'rg'ang. Pomidorli massaga rayhon, ziravorlarni soling va aralashtiring. Teftellarni pomidorli qaylaga cho'ktiring. Qizib turgan pechda, 7-10 daqida pishirib oling.
5. Belgilangan vaqt o'tib tayyor teftellar ustidan zaytun yog'ini quying. Smetana va petrushka ko'kati bilan bezagan holda dasturxonga torting. Mazali taom tayyor!
Yoqimli ishtaxa!
