У тэлеграм-канале "Отчислено" апублікавалі перапіску, дзе ананімная крыніца сцвярджае, што да пачатку навучальнага года з мінскіх ВНУ адлічылі больш за 30 чалавек. Нібыта студэнты выпівалі дзесьці ў парку ў Мінску, на іх выклікалі міліцыю, хто не ўцёк — адлічылі. Большая частка адлічаных (18 чалавек) — студэнты БДУ. Таксама ў перапісцы згадваюцца 17 адлічаных студэнтаў БНТУ.
У саміх універсітэтах дзівяцца інфармацыі, што хтосьці ўжо адлічаны.
Па словах адказнага па сувязях са СМІ ў БНТУ Канстанціна Бераснева, інфармацыя пра адлічаных студэнтаў БНТУ — няпраўда: "Нікога не адлічалі, усе ёсць, усе на месцы".
Больш за тое, за распіццё алкаголю на вуліцы не адлічваюць з універсітэта, сцвярджае прэс-сакратар БНТУ: "Па статуце не належыць адлічваць за паводзіны. Могуць выселіць з інтэрната, калі ты піў у ім. Вядома, могуць рабіцца дэканатам нейкія захады. Але адлічваюць за дрэнную вучобу", — тлумачыць Канстанцін Бераснеў.
Студэнты БДЭУ балявалі ля аўтавакзала “Усходні” і пакінулі гармідар
Прэс-сакратар БДУ Алена Марцулевіч таксама нічога пра адлічэнні не чула: "Пакуль такой інфармацыі афіцыйна ва ўніверсітэце няма. Дапусцім, гэта падзея адбылася. Але як можна ўжо на наступны дзень іх адлічыць? Гэта ж загады трэба рыхтаваць. У нас 21 факультэт. Трэба глядзець дакумент, які рэгулюе ўнутранае прадпісанне. Гэта не хуткая справа".
Нават калі б такіх студэнтаў вырашылі адлічыць, то з гэтым спярша павінны разабрацца ўніверсітэцкія юрысты і высветліць, ці можна так зрабіць, кажа яна.
Зрэшты, сама прэс-сакратар не супраць адлічэння студэнтаў за п'янства. "А не шкодзіла б адлічваць — няма чаго піць. Але зноў жа пытанне, а ці распівалі яны? Можа, гэта фэйк? Іх дысцыплінаваць трэба. Яны вось так укідваюць інфармацыю і толькі час наш марнуюць. І гэта не аднойчы", — заявіла Алена Марцулевіч.