Соңгы елларда умартачылык белән шөгыльләнүчеләр артканнан-арта. Тоташ авылны хәтерләтүче умарталыкларны да күргән бар. Яшерен-батырын түгел: бал җитештерүчеләр янәшәдә яшәүчеләр өчен зур хәвеф тудыра. Бал корты чагудан үлүчеләр турында да ишетелеп кенә тора.
Күптән түгел Татарстанның Түбән Кама районы Прости авылында, бал корты чагып, 78 яшьлек ир үлгән.
Пенсионерны авыл урамы буйлап атлаганда бал корты чаккан. Аңа берничек тә ярдәм итеп өлгерә алмаганнар. Ул өч минут эчендә җан биргән.
Пенсионерның корт чагудан йөрәк һәм үпкә авыруы кискенләшү нәтиҗәсендә вафат булуы ачыкланган. Әлеге авылда яшәүчеләр инде берничә ай дәвамында корт чагудан зарлана. Авыл уртасында зур умарталык булганлыктан, урындагы халык арасында бал кортлары һөҗүменнән интегүчеләр шактый икән.
Моңа кадәр бер хатын-кызны корт чагып, хастаханәгә озаткан булганнар. Июльдә Түбән Кама районының Уратма авылында тагын бер кеше корт чагудан үлгән.
Автор: Миләүшә Латыйпова