Aziz bekajonlar taqdim etilgan pechenya kattalarga ham kichiklarga ham birdek yoqishi turgan gap. Yoshlik chog'larini eslatuvchi pechenya bor yo'g'i 20 daqiqada tayyor bo'ladi. Hushbo'y isi xonadoningizga tarqalishi bilan yaqinlaringizning o'zi dasturxon davrasiga jam bo'lishadi. Retseptni albatta saqlab qoling!
Kerakli masalliqlar:
- 100 gramm saryog' (yumshatilgan)
- 50 gramm shakar kukuni
- 150 gramm un
- 1 dona tuxum
- ta'bga ko'ra djem yoki quyuq murabbo
Tayyorlash usuli:
1. Eng avvalo yumshoq holdagi saryog'ni mikser yordamida ko'pirtirishni boshlang. Shakar kukunini soling.
2. Yana bir bor ko'pirtiring.
3. Tuxumni aloxida idishda, sanchqi yordamida ko'pirtiring va tuxumning yarim qismini saryog'li massaga soling. Unni soling va mikserning past tezligida aralashtiring. Bordiyu non ushog'idek massa hosil bo'lsa, qo'lingizda birlashtiring.
Asosiy maslahat! Tayyorlangan xamirga pechenya shaklini bermay turib tuxumning qolgan qismini xamirga solmang. Bordiyu xamir qattiq bo'lsa, tuxumning qolgan qismidan bir oz qo'shing.
4. Qolgan tuxum qismini soling va yana bir bor aralashtiring. Xamir nozik va juda ham yumshoq bo'lishi lozim. Xamirni maxsus konditer qopchasiga soling. Yulduzcha nasadkasini o'rnating. Pergament yozilgan qolipga pechenyalarni chiqaring.
5. Chiqarilgan pechenyalarning markaz qismida, nam qo'lingiz bilan chuqurcha hosil qiling.
6. Choy qoshiq yordamida chuqurchaga djemdan soling. 220 darajada qizdirilgan pechda, 10 daqiqa davomida pishiring.
7. Nozik va mazali pechenyalar tayyor!
Yoqimli ishtaxa!