Մարիաննա Քոքչյանին, բացի մտերիմներից, մնացած բոլորը ճանաչում են Ինստագրամի Wing 21 կեղծանվամբ։ Ինստագրամից հայտնի դարձած Մարիաննան, որը ներկայումս ամենաակտիվ բլոգերներից մեկն է, ավելի ուշ սկսեց համագործակցել նաև հեռուստաընկերությունների հետ՝ նկարահանվելով Out Dance սիթքոմում, ապա հանդես գալով որպես հաղորդավարուհի։ Wing-ը շուտով կրկին էկրանին կլինի․ նրան հեռուստադիտողները կտեսնեն արդեն հայտնի ձևաչափում՝ «ԱրմենիաTV»-ի եթերում։
Tert.am Life-ը Մարիաննայի հետ զրուցել է, որպես բլոգեր նրա եկամուտի, աննախադեպ հոնորարի, հայտնիության և հեռուստասերիալներում սկզբունքորեն չնկարահանվելու մասին։
Ավելի քան 100 000 հետևորդ ունենալու և որպես բլոգեր հաջողելու հիմքում Wing-ը տեսնում է աշխատանքային իր փորձը։ Նա ծիծաղելով նկատեց՝ 17 տարեկանում սուպերմարկետներում գովազդային ակցիաներ ներկայացնելն իզուր չի անցել, ըստ նրա, շնորհիվ այդ փորձի է, որ ինքը ներկայումս լավ գիտի՝ ինչպես է պետք համոզել ու շահեկան դիրքից ապրանք ներկայացնել։
«Շատ եմ կարևորում փորձը։ Երկու տարի սուպերմարկետներում ակցիաներ եմ ներկայացրել, և դա արել եմ սիրով։ Հիշում եմ, երբ առաջին անգամ սուպերմարկետում ակցիա ներկայացրի 17 տարեկան էի և Ամանորի նախաշեմն էր։ Առաջին հոնորարս 24000 դրամ էր։ Կաթնամթերքներից մեկի ակցիան էի ներկայացնում և դրա համար ստացա 24000 դրամ՝ երջանիկ էի և առաջին նվերը տատիկիս համար առա։ Սա, իրականում, ինձ համար ամենաթանկ վաստակն է, որը, վստահ եմ, միշտ կհիշեմ։ Այդ ժամանակ ինձ համար այդ գումարը չեմ կարող ասել, թե ինչ էր և ինչ էի զգում, որ ինքս եմ վաստակել»,- ասաց Մարիաննան։
Նա հպարտությամբ նշեց՝ արդեն աշխատել է իր առաջին միլիոնը։ Թե որքան գումար է Wing-ն աշխատում մեկ հրապարակմամբ՝ ասել չցանկացավ, փոխարենը սիրով պատախանեց հաջորդիվ հարցադրմանը՝ ո՞րն է եղել երբևէ իրեն առաջարկված ամենամեծ հոնորարը․ «Ինձ առաջարկված ամենաաննախադեպ հոնորարը եղել է 3 000 000 դրամ։ Չեմ կարող ասել, թե ինչ ապրանքանիշի հետ կապված, սակայն դա ամենաանսպասելին է եղել»։
24000 դրամ հոնորարից մինչև 3 000 000 դրամ եկամուտին հասնելու ճանապարհը, ըստ Wing-ի հեշտ չի եղել, սակայն մի կետից մյուսին հասնելու հաջողությունը նա կապում է առաջինն իր անկեղծության հետ։
«Գաղտնիքն իմ անկեղծության մեջ է։ Ես երբեք չեմ անում արդյունքի համար՝ ես դա ուզում եմ ու անում եմ։ Դա մարդիկ տեսնում են, նկատում են ու գնահատում»,- ասաց բլոգերը։
Հաջողությունից գլխապտույտ եղել է, սական, ըստ Wing-ի, գործը «աստղայինը տանելու»-ն չի հասել։ Նրա խոսքով հայտնի լինելու գիտակցումը մինչ օրս էլ երբեմն մոռանում է․ «Ինձ մոտ մինչև հիմա այդ դադարը լինում է, որ «վայ ես հայտնի եմ»։ Երբ արդեն դրսում սկսեցին ճանաչել, մոտենալ, լուսանկարվել, քաղցր խոսքեր ասել, արձագանքել՝ հասկացա, որ ես արդեն հայտնի եմ։ Չեմ չափազանցնի, եթե ասեմ, որ ամեն օր 15-20 հաճելի բովանդակությամբ նամակներ եմ ստանում»։
Հայտնիության հաճելի և, ինչու ոչ, նաև եկամտաբեր կողմին հաջորդում են նաև սահմանափակումները։ Այդ սահմանափակումներից մեկն է, ըստ նրա, երբեմն մենակ ու անտեսանելի լինելու ցանկությունն է։
«Ես սիրում եմ ֆուդկորտերում հաց ուտել, սակայն վերջին շրջանում դա արդեն անհնար է դարձել, որովհետև երբ ուշադրության կենտրոնում ես հայտնվում և այն էլ ուտելու ընթացքում՝ սկսում ես ճնշվել։ Այս առումով մի քիչ լավ չէ, բայց դրական կողմերն ավելի շատ և հատկապես այն, որ զգում ես՝ մարդիկ քեզ սիրում են։ Երբեմն ուզում եմ ուղղակի մենակ մնալ՝ որևէ մեկը չտեսնի, թե ինչ եմ անում, ինչու»,-ասաց նա։
Հայտնիության սթրեսային կողմին, երբեմն, ըստ Wing-ի գումարվում է նաև իր աշխատանքի բնյութը։ Բլոգերին, աշխատելու ժամանակ, երբեմն խանգարում են՝ հնչեցնելով տարատեսակ կարծիքներ։ Մեկ հրապարակմամբ գումարվաստակելու հետևում, ըստ բլոգերի, կա նաև նյարդային կողմ․ «Ինքս աշխատում եմ ավելի քան 300 ապրանքանիշի հետ և շատ բարդ է յուրաքանչյուրին իր տեսակի մեջ հասկանալը, լեզու գտնելը։ Շատ է լինում, երբ նկարահանման ընթացքում գալիս են, ասում, թե սա են ուզում, այս մեկը չեն ուզում։ Այդ կերպ աշխատանքային ընթացքին նրանք խանգարում են, և դու պետք է բավականին համբերատար գտնվես ու բացատրես, որ եթե ուզում եք հաջողություն ունենալ, ապա պետք է ուղղակի չխանգարել։ Այս մասով շատ բարդ է։ Վերջին նկարահանումներս կարող եմ, որպես օրինակ բերել, որ նյարդային լարվածությունը գագաթնակետին էր հասել։ Ես նման մարդկանց էլ եմ հասկանում, որովհետև, ինչ արած, ամեն մարդ ուզում է իր ապրանքանիշն ամենալավ կերպով լուսաբանվի՝ չհասկանալով, որ իրենք ոչ թե լավին են ձգտում, այլ ուղղակի խանգարում են»։
Աշխատանքային և առհասարակ սթրեսային իրավիճակների դեմ Մարիաննան պայքարում է ընկներների միջոցով։ Նրա խոսքով զրույցները լավ մարդկանց ու հատկապես մտերիմ ընկերների հետ իր համար լավագույն տարբերակն են․ «Ունեմ շատ լավ ընկերներմ, որոնց հետ զրուցում եմ, թեթևանում, իրենք ինձ դրական լիցքեր են տալիս։ Նրանց հետ խոսելուց, զրուցելուց հետո զգում եմ, որ թեթևացել եմ»։
Շարունակելով բլոգային կյանքի թեման՝ Wing-ից հետաքրքրվեցինք, թե ո՞րն է եղել հետևորդներից ստացած ամենատարօրինակ խնդրանքը։
«Շատ-շատ են տարօրինակ հարցերով դիմում, բայց կա մեկը, որն իմ մեջ տպավորվել է։ Մի կին ինձ գրել էր, որ իր ամուսինն ինձ շատ է սիրում և խնդրում էր ինչ-որ շնորհավորանք նկարեմ և տեղադրեմ սթորի բաժնում։ Սա իսկապես շատ ծիծաղելի էր»,- ասաց նա։
Ինչպես սկզբում ենք նշել Մարիաննային շուտով կտեսնեք հեռուստատեսային նոր նախագծում՝ «Դեպի ճամբար» սիթքոմում, որը եթեր է հեռարձակվելու «ԱրմենիաTV»-ի եթերում։ Իչվ վերաբերում է առհասարակ հեռուստատեսային առաջարկներին, ապա Wing-ն այսպես մեկնաբանեց․ «Հեռուստասերիալների առաջարկներ ես չեմ ընդունում, որովհետև էկրանից եկող այդ լաց, կոծ, տանջանքներն ու նման բաներն իմը չեն՝ ես ինձ նման տեղ չեմ պատկերացնում։ Իրականում, եթե համաձայնությունս տայի և նկարահանվեի հեռուստասերիալներում, ապա իմ սոցցանցային վարկանիշը մի քանի անգամ ավելի բարձր կլիներ, բայց դա ինձ համար սկզբունքային է։ Սակայն ինչ վերաբերում է սիթքոմերին, ապա դրանք ինձ դուր են գալիս, որովհետև թեթև են ու հետաքրքիր»։
Հեղինակ Զառա Ղազարյան