Кеча депутатлар чиқиш қилиб, улар Янгийўлдаги «снослар»ни ўрганишга борганида маҳаллий амалдорчалар томонидан «халқни ноқонуний митинг қилишга чорлаш»да айбланишганини таъкидлаганди.
Депутатларимиз «халқни ноқонуний митинг қилишга чорлаш»ларига ишонмайман, ишонадиганим — депутатларимиз «халқни ноқонуний митинг қилишга чорлаш»ни хаёлга ҳам келтирмайди. Яна бир нарсага ишонаман — халқимиз бировнинг чорлови билан митингга чиқмайди. «Оч қорним — тинч қулоғим» деган мақолни шу халқ ўйлаб топган.
Халқимиз митингга чиқиши учун уни жон-жонидан тўйдиришинг, охиригача устидан кулишинг, нафақат шаънини, ўзини, бутун жасади билан бирга оёқости қилишинг, ўзини ҳам, болаларини ҳам одам ўрнида кўрмаслигинг керак. Шунда, хўрликларнинг охирги босқичида у ноқонуний митингга чиқиши мумкин. Худди Хоразмдагидек.
Ёзишларича, Урганчнинг Ашхобод маҳалласидаги 400 хонадонни бузиб, аҳолисини Чондирқиёт деган қишлоққа кўчиртириб юборишган — одамлар икки ойдан бери очиқ далада чодир ва капаларда яшаяпти. Буёқда совуқ кунлар яқин, аҳолига эса янги уй қуриш учун ойлаб компенсация берилмаган. Оёқости бўлиш дегани шу.
26 июль куни узоқ кутилган компенсация пули берилиши эълон қилинган, лекин берилаётган пул шартномада кўрсатилган маблағнинг фақат 8 фоизи экани маълум бўлган. Боз устига, компенсация пулидан 10 фоиз миқдорида маблағ ушлаб қолиниши ҳам айтилган. Мана буниси — одамларнинг устидан охиригача кулиш дейилади.
«Пул — жигардан» деган гап бор. Икки ойдан бери очиқ осмон остида яшаб юрган одамлар ваъда қилинган пул камроқ берилишини, камига маълум қисми ушлаб қолинишини ҳам эшитгач кўчага чиққан. Тартибсизлик қилган. Йўлларни тўсган. Чидолмаган охири. Ахир шунча чидади, яна қанча кулиш мумкин унинг устидан?
Хўш, бу ерда «халқни ноқонуний митинг қилиш»га ким чорлаган бўлиб чиқяпти? Халқ орасидаги ё хорижий ОАВдаги «ношукр бузғунчилар»ми? Ё халқ сайлаган депутатларми? Йўқ. Халқнинг елкасига ўзича хон, кўланкаси майдон бўлиб чиқиб олган амалдорчалар, ҳокимчаларнинг ўзи. Халқни қўзғатган, халқни норози қилган — ана шу ноқобил раҳбарчалар.
Энг қизиғи, Хоразм ҳокими 27 июль куни «қўзғалган халқ» вакиллари билан учрашиб, икки ойдан бери берилмаётган компенсация пулларидан 5 миллиарди 27 июлнинг ўзида берилишини, 1 августгача яна 15 миллиард берилишини, 10 августгача ҳамма билан тўлиқ ҳисоб-китоб қилинишини айтибди. Икки ойдан бери ҳал бўлмаган ва, катта эҳтимол билан, келгуси икки ойда ҳам ҳал бўлмаслиги мумкин бўлган муаммо, мана, энди 10—15 кунда ҳал бўлармиш.
Аввалроқ худди шундай воқеаларни Сергелида кузатгандик, аввалроқ шунга ўхшаш ҳодиса Термиздаги «дамасчилар» билан юз берганди. Худди шунга ўхшаш ҳодиса Қашқадарёнинг Яккабоғида ҳам бўлди — тадбиркор ҳоким ўринбосарининг устига бензин сепиб ўз норозилигини билдирганидан сўнг, унинг бузилиши керак бўлган дўкони бузилмайдиган бўлди.
Бу нима дегани? Бу билан давлат бошқа ҳудудлардаги чайлалар, чодирлар, капаларда яшаётган, уй ва биноларидан зўрлик билан олиб чиқилаётган фуқаролар ва тадбиркорларга қандай сигнал йўллаяпти? Норозиларнинг бари энди ҳақли компенсация пулларини олиши, инсоний муносабат билан “сийланиши” учун энди йўлларни ёпиши, тартибсизликлар қилиши, оломон бўлиб кўчада бақириб-чақириши керакми?
Тинчлик бўлсин.