Бобур Оқилхонов Тошкент шаҳридаги Мирзо Улуғбек номидаги Халқаро мактабда ўқиган. Сўнгра, 2000-2010 йилларда Австралиядаги Charles Sturt университетида ахборот технологиялари бакалаври даражасини олиш учун таҳсил олди. У кўпгина бизнес-лойиҳаларни амалга оширган, ошириб келмоқда. Шунингдек, бизнесмен иш фаолиятида қилган хатоларини эътироф этишдан қўрқмайди. Чунончи, Б.Оқилхонов Vkontakte компанияси асосчиси Павел Дуров билан фоизларда қарама-қаршиликлар боис шартнома тузмаган, инвестиция киритмаган. Натижада, Павел Дуров таклиф қилган ушбу истиқболли компаниянинг 20 фоизига эга бўлмаган.
– Ўзбекистонга борганингизга анча бўлдими?
– Ўзбекистондан АҚШга қайтганимга 2 ой бўлди. Ватанда анча қолиб кетдим – 8 ой. Мамлакатимизда “Ишончли рақам” номли фондда директорнинг инвестициялар ва технологиялар бўйича ўринбосари вазифасида ишладим. Ҳозир яна Америкадаман.
– Бу ерда нима иш билан шуғулланасиз? Билишимизча, касбингиз ахборот технологиялари бўйича асосланган.
– Ахборот коммуникацион технологияларини яхши тушунаман. Ёшлигимдан шу соҳага қизиқиб келганман. Бошқа соҳаларга ҳам ҳаракат қилиб кўрдим, лекин менга бу йўналиш маъқул бўлди. Америкада АКТ саноати бўйича ишлаб келмоқдаман. Айни вақтда АКТ билан боғлиқ компанияни бошқаряпман.
– АКТ соҳасида иш бошлаганингиз тарихи ҳақида гапириб берсангиз?
– 1997 йил эди. Интернет бўйича биринчи маълумотни дадамдан эшитганман. “Интернет деган нарса чиққан, ўрган”, деганлар. У вақтларда, биласиз, ҳали интернет нималиги ҳақида одамларда тушунча йўқ эди. Компьютерни эса эшитганман, кўрмаганман. Кейинчалик компьютер ва интернетнинг нималигини билдим. Қизиқдим шу соҳага. Австралияда интернет дастурчилиги бўйича ўқидим.
– Ҳозир ўзбек ёшлари орасида ахборот коммуникацион технологияларига қизиқиш ортган. Уларга қандай маслаҳат берган бўлар эдингиз? Улар ҳам сизга ўхшаб Австралияда ўқишсинми ёки бошқа йўллари борми? Бу соҳада кўп хатолар қилдим, деб айтгандингиз, улар бу хатоларни такрорламасликлари учун нима маслаҳатлар берасиз?
– Ҳамма нарса одамнинг мақсадига боғлиқ. Мен бу ишни бошлаган вақтда дастурчилар узоқдан туриб ишлай олмас эди, яъни Ўзбекистонда яшаб Америкадаги бирор АКТ компаниясида ишлаб бўлмас эди. Энди вазият ўзгарди. Ҳозир Ўзбекистонда ўқиб ва яшаб ҳам Американинг бирор компаниясида ишласа бўлади, фақат малака, қунт, билим талаб этилади, холос. Бу ҳозирги ёшлар учун жуда катта имконият. Тил билиш ҳам бу ерда катта ўрин тутади, инглиз тилини чуқур билиш муваффақиятнинг асосларидан бири.
– Ўзбек ёшларининг дунёдаги машҳур компанияларда ишлагиси келади. Шундай йирик компаниялар, масалан, Amazon, Google компанияларида ишлаш учун қандай салоҳиятга эга бўлиш керак?
– Ҳаммаси тажрибага боғлиқ. Ҳеч ким ўқишни битириб, дарҳол Amazon ёки шундай йирик компанияларга ишга киролмайди.
– Ҳозир дастурчилик энг керакли касблардан бирига айланди. Айтинг-чи, Ўзбекистонда энг зўр дастурчи ким?
– Тўғриси, бу ҳақда билмас эканман. Дастурчиликнинг ҳам йўналиши кўп. Шу жиҳатдан келиб чиқиб бир нарса айтиш мумкин.
– Асли ўзбекистонликсиз, ўзбекларда ватан ҳисси кучли бўлади. Ватандагиларнинг АКТ бўйича билимларини ошириш учун ёрдам берган бўлармидингиз?
– Шундай мақсадим бор, ўқув курси очмоқчиман. – Нима сизга халақит беряпти?
– Вақт масаласи – вақт етишмайди. Ҳар ойда ўзбекистонлик ёшлардан 10-15 та хат оламан: АКТ соҳасини менга ўргатинг, деб мурожаат қилишади. Худо хоҳласа, бу соҳа сирларини ўргатиш ниятим бор. Бир-икки ой ичида АКТ соҳасидаги йўналишларни ўргатиб бўлмайди. Бу ўқув курси камида бир йилга чўзилиши керак.
Ҳасан МАМАСАИДОВ суҳбатлашди.
(с) «Soliq plus»
Телеграмдаги каналимиз: https://t.me/soliq_plusuz
FACEBOOK: https://fb.com/Soliqplusuz
Условия использования материалов:
Все права защищены законами Республики Узбекистан о средствах массовой информации и об авторском праве и смежных правах.
1) Необходимо поставить голубой линк к слову "«Soliq plus»" и направить на наш телеграм канал: https://t.me/soliq_plusuz
2) Неосведомленность об этих правилах не освобождает от ответственности, зафиксированной в соответствующих законодательных актах.
Подписной индекс: 641