Nozik, og'izda shundoqqina erib ketuvchi pechenya retsepti bilan tanishing. Aziz bekajonlar e'tiboringizga yevropa oshxonasida keng tarqalgan pechenya retseptini taqdim etaman. Ushbu pechenyani bir bor sinab ko'ring, sizga va yaqinlaringizga juda ham ma'qul bo'ladi. Hushbo'y isi xonadoningizni egallashi bilanoq barcha yaqinlaringiz yoningizga jamu-jam bo'lishadi. Shuningdek, bolajonlarga ham juda yoqadi. Retseptni albatta saqlab qoling!
Kerakli masalliqlar:
Xamir uchun:
- 1 dona tuxum
- 120-125 gramm shakar
- 125 gramm 82,5% saryog'
- 10 ml sut
- 260 gramm un
- 1/2 choy qoshiq qabartma
- 1 choy qoshiq vanilin yoki vanilin tayoqchasi
- bir chimdim tuz
Ustiga sepish uchun: - 20 gramm yirik shakar
- 1 choy qoshiq dolchin (koritsa)
Tayyorlash usuli:
1. Bir idishda yumshatilgan saryog', shakar, tuz, vanilin shakari yoki tayoqchasining o'rta qismini birlashtirib, kremli massa holigacha ko'pirtiring.
2. Tuxum va sutni qo'shing va bir xil massa holigacha ko'pirtirishda davom eting.
3. So'ng, un va qabartma aralashmasini bir necha qismga bo'lib solgan holda xamir qoring. Tayyor xamirni chetga oling.
4. Pishirish qolipi hajmiga munosib ravishda pergament qog'ozi kesing. Pergament qog'ozini stol ustiga olib, qog'oz ustidan xamirni o'rta qalinlikda yoying. So'ng, o'tkir pichoq bilan xamirni rombik shaklda kesib chiqing.
5. Extiyotkorlik bilan xamirli qog'ozni pishirish qolipiga qaytaring va 10-15 daqiqaga muzlatgich muzxonasiga joylang.
6. Bu vaqt mobaynida shakar va dolchinni aralashtiring. Pechni 180 darajaga qizdirishga qo'ying.
7. Belgilangan vaqt o'tib, shakar-dolchin aralashmasi bilan pechenya ustini sepib chiqing. Qizigan pechda 25-30 daqiqa davomida pishiring.
8. Hushbo'y isi xonadoningizni egallagan pechenyani pechdan oling va takror o'tkir pichoq bilan kesing. Pechenyalar xona harorarida sovigunga qadar qolipda qoldiring. Mazali pechenya tayyor!
Yoqimli ishtaxa!