Tilla tusli va ko'rinishi juda ham ishtaxaochar bunday pirog dasturxon davrasida barchaning ko'ngliga manzur bo'lishiga ishonchim komil. Aziz bekajonlar ushbu pirog bayram dasturxoni uchun ham ajoyib tanlov bo'ladi. Yaqinlaringiz uchun tayyorlasangiz ham ularni lol qoldirishingiz turgan gap. Retsept taomnomangizdan o'rin oladi degan umiddaman.
Kerakli masalliqlar:
Asosiga:
* 100 gramm porey piyozi
* 4 osh qoshiq o'simlik yog'i
* 300 gramm baliq filesi
* 400 gramm ismaloq
* 3 dona pishirilgan tuxum
* ta'bga ko'ra tuz va murch
Xamir uchun:
* 200 gramm saryog'
* 200 gramm smetana
* 2 dona tuxum sarig'i+1 dona
* 550 gramm un
* 1/2 choy qoshiq qabartma
* 1 osh qoshiq shakar
* bir chimdim tuz
Tayyorlash usuli:
1. Birinchi navbatda pirog uchun xamirni tayyorlang. Buning uchun: unni qabartma bilan aralashtiring. Tuxum sarig'i, shakar va tuzni soling va venchikda aralashtiring. Yumshatilgan saryog'ni soling aralashtiring, smetanani soling va takror aralashtiring.
2. Yumshoq va cho'ziluvchan xamir qoring va xamirni 20 daqiqaga muzlatgichga joylang.
3. Bu vaqt mobaynida asosni tayyorlashga kirishing. Porey piyozini yumaloq shaklda to'rg'ang va o'simlik yog'ining yarim qismida, 2-3 daqiqa davomida qovurishni boshlang. Ismaloqni soling va 3-4 daqiqa qovuring. Tuz va murch soling va olovdan oling.
4. Baliq filesini o'rtacha kattalikda, to'rtburchak shaklda, tuxumni ham shunday to'rg'ang. Baliq, tuxum va ismaloqli qovurmani birlashtiring. Xamirni ikki qismga, birini kichikroq qilib bo'ling.
5. Xamir bo'laklarini yumaloq shaklda, o'rta qalinlikda yoying. Xamirning katta qismini, saryog' surtilgan qolipga, devorlari bo'ylab solib chiqing.
6. Qolipga solingan xamir ustiga asosni soling. Ikkinchi xamir qismini yoping va xamir chetlarini yopishtiring, ortiqcha qismlarini kesib oling. Xamirning ortiqcha qismidan hohishga ko'ra bezash uchun shakllar yasab qo'ying. Pirogning o'rta qismida katta bo'lmagan ochiqlik hosil qiling.
7. Pirog ustini tuxum sarig'i bilan surting. Pirogni 180 darajada, 50 daqiqa davomida pishiring.
8. Tayyor pirogni qolipda biroz sovuting va dasturxonga tortishga xozirlang.
Yoqimli ishtaxa!