Bekajonlar usti qarsildoq, ichi esa juda mayin va sersuv tovuq qanotchalarini mana bunday usulda pishirib ko’ring. Ta’m jihatidan bunday tovuq qanotchalari tez ovqatlanish shaxobchalari tarmog‘i KFC ga o’xshab ketadi. Albatta bunday taomni har kuni iste’mol qilish yaramaydi, ammo har zamon shunday mazali yegulik bilan o’zimizni siylab turishimiz ham lozim! Retseptni esa albatta saqlab qoling!
Kerakli masalliqlar:
- 9-10 dona tovuq qanoti
- ta'bga ko'ra tuz va chili qalampiri
- 2-3 dona sarimsoq tishchasi
- 2 choy qoshiq 5% sirka
- 250 gramm makkajo'xori parchalari
- 2-3 dona tuxum
- un va o'simlik yog'i
Tayyorlash usuli:
1. Tovuq qanotlarini bir necha bo'laklarga bo'ling. Yuving va quriting. Tayyorlangan tovuq qanotlariga tuz, chili, mayda to'rg'algan sarimsoq va sirkani birlashtiring, aralashtiring. 2-3 soatga marinad ichida qoldiring.
2. Tovuq qanotlari marinadlangunga qadar makkajo'xori parchalarini tayyorlab oling. Makkajo'xori parchalarini qo'lda mayda-mayda bo'laklarga bo'lganingiz ma'qul. Blenderdan aslo foydalana ko'rmang, aks holda kutilgan natijaga erishmaysiz. Achchiq ta'mni yoqtirsangiz parchalarga chili qalampiridan qo'shishingiz mumkin.
3. Shuningdek, barcha panirovkalarni tayyorlab oling. Unni bir idishga, tuxumni aloxida idishda ko'pirtiring. Tayyorlangan panirovkalarni ketma-ketlikda terib oling: un, tuxum va makkajo'xori parchalari. Chuqur tovada yoki maxsus frityurda o'simlik yog'ini qizdiring.
4. Har bir tovuq qanoti bo'lagini avval unga so'ng, tuxum va makkajo'xori parchasiga botirgan holda, qizdirilgan yog'da, har tomonlama 3 daqiqadan qovurib oling. Qovurilgan bo'laklarni oshxona sochig'iga oling. Ortiqcha yog'i ajralishi uchun.
5. Tayyor qarsildor tovuq qanotlarini sous bilan birga darhol dasturxonga torting.
Yoqimli ishtaxa!
