Yoz fasli qishga tayyorgarlik ko'rish fasli hisoblanadi. Shu bois e'tiboringizga hushbo'y rayhon va sarimsoq bilan quritilgan pomidor qoqisi retseptini taqdim etaman. Qishning sovuq kunlarida salat yoki boshqa taomlarni tayyorlashda juda ham ma'qul bo'ladi. Bekajonlar pomidor pishgan mavsumda albatta ushbu pomidor qoqisini tayyorlang!
Kerakli masalliqlar:
1,5 kg pomidor (o'rta hajmda)
2 shoxcha rayhon ko'kati
bir chimdim tuz
2-3 dona sarimsoq tishchasi
2-3 stakan zaytun yog'i
1 choy qoshiq balzamli sirka
Tayyorlash usuli:
1. Pomidorlarni ikki qismga, katta bo'lsa to'rt qismga bo'ling. O'rta qismi va urug'larini ajrating. Bordiyu siz tanlagan pomidor qattiq, sharbatsiz bo'lsa, o'rta qismini ajratish shart emas. Pomidorlarni pergament qog'ozi yozilgan pishirish qolipiga tering. Tuz seping va hohishga ko'ra quritilgan ko'kat bilan seping.
2. Pomidor terilgan qolipni 100 darajada qizdirilgan pechga, 4-5 soatga quritishga qo'ying.Ora-orada pech eshigini qiya holda ochib qo'ying, ajralgan namlik chiqib ketishi uchun. Pomidorlarni so'nggi namligi chiqib ketgunga qadar quritish shart emas. Aks holda mazali bo'lmaydi.
3. Tayyor pomidorlarni sterillangan bankaga soling, bir nechta sarimsoq tishchasi va rayhon shoxchasidan soling. Zaytun yog'ini quying va 1 choy qoshiq balzamli sirkadan quying.
4. Bankani qopqoq bilan yoping va muzlatgichda saqlang.