Bekajonlar e'tiboringizga oddiy masalliqlardan tayyorlangan, biroq juda ham mazali, noan'anaviy usulda tayyorlangan, grechkali kotlet retseptini taqdim etaman. Ushbu kotletlar ertalabki nonushta, yengil tushlik va hattoki ortiqcha vazndan halos bo'lishni istayotgan kishilar uchun ham juda ma'qul bo'ladi. Bir bor sinab ko'rib, o'zingiz ishonch hosil qiling.
Kerakli masalliqlar:
1 stakan grechka
3 dona o'rtacha kartoshka
1 dona sabzi
1 dona piyoz
0,5 stakan suv yoki bulyon
ta'bga ko'ra ziravorlar
o'simlik yog'i
ta'bga ko'ra ko'kat
Tayyorlash usuli:
1. Grechkani qaynating. Buning uchun: grechkani 2 stakan suvda, 15 daqiqa davomida qaynating. Natijada grechka butun suyuqlikni shimib olishi lozim.
2. Tozalangan piyozni yupqa, yarimhalqa shaklida, sabzini esa qirg'ichning katta tomonidan chiqaring.
3. Kartoshkani tozalang, qirg'ichning kichik tomonidan chiqaring va ortiqcha sharbatidan siqib oling.
4. Qirg'ichdan chiqarilgan kartoshka va qaynatilgan grechkani birlashtiring. Ziravorlardan soling.
5. Birlashtirilgan masalliqlarni yaxshilab aralashtiring. Tayyorlangan qiymaga kotlet shakli berilganda hajmini ushlab tura oladigan massa hosil bo'lishi lozim.
6. Tayyorlangan qiymadan hohishingizdagidek hajmda kotletlar yasang.
7. Kotletlarni tovada qizdirilgan yog'da, har tomonlama qovuring.
8. Aloxida tovada, bir oz o'simlik yog'ida piyoz va sabzini qovuring.
9. Kotletlarni kastryulkaga tering, bir qator kotlet terilgandan so'ng, qovurilgan sabzavotlardan bir qism soling. Qolgan masalliqlar bilan shu ketma-ketlikni takrorlang. Bulyon yoki suv quying va 20 daqiqaga, past olovda dimlang.
10. Belgilangan vaqt o'tib, kotletlarni maydalangan ko'kat bilan seping. Kotletlar tayyor!
Yoqimli ishtaxa!
