(послание диякона Феодора,сыну протопопа Аввакума,Иоанну)
Брату верну о Господе благодати тезоименитому Иоанну, присному чаду
восточныя святыя Церкви, радоватися и здравствовати в вере православней, и всем верным братиям благодать и мир от Начальника веры и Совершителя Исуса.
А еже вопрошаеми о попех, рукоположенных от прежних православных
святителей и соблазнившихся от Никона богоотступника прелести, инако
жертву приносяще, и познавшеся паки по древнему служити начаша, и таковии подлежат суду священных правил, понеже не сопротивишася ни мало прелести нововводным преданиям. На то бо священник всяк рукополагается, яко законно страдати хощет, по Златоусту; и добрый пастырь душу свою полагает за овцы, по Евангелию. И они, не ведуще, мню, своего священническаго сана и достоинства, тако от простоты погрешиша, все же и страха ради мучительских запрещений слицемериша вмале, и от таковых по нужи мощно всякую святыню
приимати, непорочнаго ради на них благословения первых наших святых пастырей: крещение, и исповедь, и причащение, и прочая. Кроме же нужи — никакоже от них не примай, понеже слюбодействоваша в догматех. А лучше тех ныне и невозможно обрести праваго священства. Ох и горе, и, увы! Третие прииде на всю землю, иже под небесем! Но надеяйся на Христа истиннаго, не оставлен будет всяк правоверный. Да и старии ставленники, коснувшеися агнца
неправеднаго, по священномученика Ипполита, папы Римскаго, аще паки обратившеися ко истинней службе, и с таковым намерением держати начнут священства, яко и умрети за старое благочестие, а не предати паки, то от таковых достоит благословение приимати и во всем сообщатися, помянувши Петра верховнаго, яко по отречении своем, плакася горко, прият Христом бысть и апостольства не отлучен. И аще не с таковым обращением и старыя попы по падении своем служат, но мыслят двоедушно, егда понуждени будут от отступник к прелести новых догмат, и тогда второе и третие отступити хотят,
паки вертящеся, яко прах ветром в разуме своем и в неигрательных играти смышляюще, то от таковых, яко от Июды-предателя, чюждатися православным, яко на время веруют, а во время напасти и отпадают. Ибо апостол Христов Петр по покаянии своем не отвержеся паки, но пострада и умре за Христа и за веру Его, и душу свою положи за Христово стадо. И лучьше ни от когоже наставлятися, нежели от злаго водиму быти, по Златоусту Иоанну, ко Евреом, беседа 34, и прочая тамо пространно. А которые попы от Никона отступника ставлены и от никониян после мору, паче же от ста седмдесят четвертаго году, егда совершенно православие все отринуша, древнее предание святых апостол и богоносных отец, и оболгаша их льстивно и охулиша, нечестие же всякое прияша, и оправдаша, и укрепиша, и новоразвращенныя богомерския книги со многими ересьми в них похвалиша, и
всех еретик крещение римское и священство их гнусное прияша, ихже святии отцы наши проклинаша и от святыя Церкви отметаша, понеже Рим всех ересей приятелище и источник всякаго нечестия, латынское мудрование богомерское. И тем отступлением своим и с латины сообщением чюжи себе сотвориша архиерейства, по священным правилом святых апостол и богоносных отец седми Вселенских соборов и девяти Поместных, и поставляеми от них попы и дияконы не священи суть, по правилом; вси они отступницы глупии, и поставляеми от них канонному суду подлежат и анафеме, и православным
християном ныне не подобает их благословения приимати, ни службы, ни крещения, ни молитвы, и в церкви с ними не молитися, ниже в дому. То есть часть антихристова полка и от исполнения церковнаго самоволне отсекшеся, и все действо и вера в прелести содержими суть и укрепляеми не любовию Святаго Духа и не советом, но гордостию сатаниною и мучением различным. И в том им судия истинный Христос Бог наш!
А отступление их указует Дух истинный во Апокалипсисе, в 13 главе, по
числу зверя 666, и Книга о вере, глава 30. И святый Ипполит, папа
Римский, о сем же выше речено. Той пишет в Слове своем о Страшном суде и о антихристе, — за полторы тысящи лет и боле Святым Духом провиде о ныне наченшемся времени, и рече о пастырех злых, губяй души: в та времена будет злый вождь, (то есть неправое священство: ныне сбысться), — агнец неправедный, Титин, то есть жертва не правая в числе зверином: Титин бо тоже666 в числе стоит. Посем и инии богословцы глаголют мнози, что в последняя времена Христовы веры не будет на земли, кроме в малых токмо останется, крыющихся в пустынях и горах. Сего ради Христос, Сын Божий, в последняя дни, назад не оглядываяся, бегати повеле от прелести, поминая жену Лотову. И паки глаголет: «Егда придет Сын Человеческий, обрящет ли веру свою на земли?» И на се богословцы глаголют, толкуя: «Не обрящет». И паки рече Христос: «Егда узрите мерзость запустения, стоящу на месте святом» — и прочая, рече: «Чтый да разумеет». Мерзость запустения непреподобно священство и прелесть антихристова на святом месте поставится, сиречь на олтари неправославная служба, еже видим ныне збывшееся. Инаго же отступления уже нигде не будет: везде бо бысть, последняя — Русь зде. И то от часа сего на горшее происходити будет царьми нечестивыми: то суть рози антихристовы, — ими силно дело отступническое, без тех же не можно. Два рога от земли исходяща видеБогослов: и един от тех есть, вторый же по нем будет пособитель злу. Во время се ни царя, ни святителя. Един бысть православный царь на земли остася, да и того не внимающаго себе, западнии еретицы, яко облацы темнии, угасили христианское солнце и свели во тму многия прелести и погрузили, да не возникнет на истинный свой первый свет правды. Увы, увы, бысть! И се, возлюбленнии, не явно ли антихристова прелесть показует свою личину? Да внимаем себе, сиречь отвсюду себе обзираем и с нечестивыми себе не смешаем,
— путь бо нечестивых погибнет, — и развращеннаго их учения не послушаем,
да не осудимся вечно от Христа и святых Его с ними, отступники и еретики, но бегаем от них и крыем Главу свою — Христа, да не разлучимся с Ним во веки. Воньмем Апокалипсис, главу 13. И видех (глаголет Богослов) зверь восходящь от земли, имяше два рога, подобна агньчим, и глаголаше, яко змий, и власть перваго зверя всю творяше, и творяше землю и вся живущия на ней поклонятися первому зверю.
Толк. Прежде виде Богослов на песце стояща ссдмиглаваго зверя. Сие
назнаменует римскую власть и державу, и весь запад со иными государствы по тысящи летех вочеловечения Христова отпадоша от православныя веры
хрисстиянския. Потом же виде из земли восходяща двоерогаго
зверя. Сие знаменует Рускую державу, в лета наша бысть сей зверь двоерогой. Чтый да разумеет. И дано бысть ему дати дух образу зверину, да глаголет икона зверина, и сотворит, да иже, аще не поклонится образу зверину, убиен будет. И сотворит вся малыя и великия, богатыя и убогия, свободныя и работныя, да даст им начертание на десней руце их, и на челе, да ни кто же возможет ни купити, ни продати, токмо кто их имать начертание, или имя зверя, или число имени его. Зде есть мудрость. Иже имать ум, да почтет число зверино, число бо человеческо есть, и число его 666. Толк. Не явно ли есть сего двоерогаго зверя в Русии нашей действо и
малым детем? Во 160 году поставлен бысть Никон патриархом при царе
Алексие: и начаша оба, патриарх и царь, казити в Русии християнскую веру. И сперва триперстную ересь в Церковь внесоша, сиречь печать антихристову, и нача ю силою и лестию давати людем на десную руку, малым и великим,богатым и убогим, свободным и работным, а нехотящих прияти печати, на тех муки великия и смерти налагаху, и иныя безчисленныя воровския умыслы творяху ко истреблению православныя веры. Богослов глаголет: зде мудрость есть. Гораздо мудрено и умысловати есть. И сперва царь, до соборища того, бутто и не ево дело, а волю Никону всю дал, вору. Он же, со дияволом на складу, что захотел, то и делал: в седми летех своея власти вся превратил в церкви, и бысть вся горняя долу. Потом и соборище собра царь Алексей на подкрепление тоя бляди в лета та, иже Богослов назнаменует: число бо человеческое, и число его 666. Человеческое число отступление римско, — столько лет, как отпали; а число его имя антихристово, о немже Ипполит священный повествует. Да и зверь двоерогой в том числе летех прииде от земли нашей и подклоняет первому зверю свою землю, сиречь папе римскому в дух
един, еже в веру, люди своя нудит, а непокоряющихся ему убивает. Две печати Богослов глаголет, едина на руце, а другая на челе (печатает) три перста на руце сам на себя скудоумный возлагает печать, и на челе печатают святители з бесами. Два же рога у зверя — две власти знаменует: един победитель, Никита, по Алфавиту, или Никон, а другий — пособитель — Алексей, пишется в книгах рожка круглинки, в космах, яко у барашка, добродетель знаменует, льстя житием, являяся добрым, бодый Церковь рогами и уставы ея стирая. Еще же ли не разумееши? Да слыши: аз ти дебело возглаголю. Царь Алексей девять лет добро жил, в посте и в молитве и милости. А Никон егда на патриаршество вкрался, показуя человеком лукаву добродетель. Егда же слюбление сотвориша,
яко Пилат и Ирод, тогда и Христа распяша: Никон побеждать учал, а
Алексей пособлять испоттиха. Тако бысть исперва. Аз самовидец сему. Ей,
аминь.