Ajoyib salat! Yoz mavsumining jazirama kunlarida yengil tushlik yoki kechki ovqat o'rnini egallaydigan, mazali salat retsepti bilan tanishing. Aziz bekajonlar tayyorlanishi oddiy bo'lgan salat sizga va yaqinlaringizga juda ham ma'qul bo'ladi. Ushbu salatni albatta sinab ko'ring!
Kerakli masalliqlar:
- 200 gramm baliq filesi (oq go'shtli)
- 1/2 shirin, qizil bulg'or qalampiri
- 1/2 shirin, yashil bulg'or qalampiri
- 1/2 dona bodring
- 1/2 dona qizil piyoz
- 1/2 bog' ukrop
- bir necha shoxcha yalpiz
- 4 osh qoshiq zaytun yog'i
- 1 osh qoshiq limon sharbati
- 1 osh qoshiq sirka
- 1/4 tuz va murch
Tayyorlash usuli:
1. Baliq go'shti filesini yuving, quriting va folga qog'ozi yozilgan pishirish qolipiga tering. Zaytun yog'idan seping, tuz va murch seping. 180 darajada qizdirilgan pechda, 15-20 daqiqa, butunlay tayyor bo'lgunga qadar pishiring.
2. Tozalangan bulg'or qalampirini 1 sm hajmda, to'rtburchak shaklda to'rg'ang. Bodringni 1 sm hajmdagi bo'laklarga bo'ling. Piyozni yupqa, yarimhalqa shaklida to'rg'ang. Sabzavotlarni salat dasturxonga tortiladigan idishda birlashtiring, yalpiz barglarini solib, aralashtiring.
3. Zaytun yog'ini limon sharbati, sirka, murch va tuz bilan aralashtiring. Mayda to'rg'algan ukrop ko'katini qo'shing. Sabzavotlarni tayyorlangan zapravka bilan aralashtiring. Zapravkadan bir qism baliq uchun olib qo'ying.
4. Baliq tayyor bo'lishi bilan sabzavotlar ustiga terib, qoldirilgan zapravkadan seping va darhol dasturxonga torting. Salat tayyor!
Yoqimli ishtaxa!