Baklava - turk oshxonasining ko'p qavatli, yong'oqli, bo'lakchalarga bo'lingan pirogi hisoblanadi. Ushbu pishiriq juda ham nozik va mazali. Sharqning bu mashhur shirinligini Turkiyada bo'lgan har bir turist tatib ko'rishni hohlaydi. Bekajonlar o'zingizni Turkiya turisti o'rnida xis qiling. Ushbu pishiriqni o'z qo'llaringiz bilan tayyorlashingiz uchun retseptni taqdim etaman. Tayyorlanishi vaqtingizni olishga arzigulik pishiriq. Yaqinlaringizga ham juda manzur bo'ladi.
Kerakli masalliqlar:
- 450 gramm tayyor filo xamiri
- 450 gramm yong'oq va bodom
- 250 gramm saryog'
- 1/4 choy qoshiq dolchin kukuni (koritsa)
- 2 osh qoshiq limon sharbati
- 1 dona apelsin po'sti
- 250 ml suv
- 200 gramm shakar
- 120 gramm asal
- ta'bga ko'ra vanilin
Tayyorlash usuli:
1. Birinchi navbatda pechni 160 darajaga qizdirishga qo'ying. Pishirish qolipi devorlari va tag qismini saryog' bilan surting. Yong'oqlarni maydalang va dolchin bilan aralashtiring.
2. Xamirni oching. Qolipga mos hajmda bo'laklarga bo'ling. Xamirning bir qismini qolipga soling, eritilgan saryog' bilan surting. Shu tarzda yana 3 qatlam qiling.
3. Xamir ustidan maydalangan yong'oq-dolchin aralashmasini seping. Yong'oq tugagunga qadar shu holda davom eting. Qolgan xamir bo'laklariga yog' surtgan holda, ketma-ketlikda, ustma-ust soling.
4. O'tkir pichoq yordamida baklavani to'rtburchak yoki rombik shaklda kesib chiqing.
5. Qizib turgan pechda 60 daqiqa davomida pishiring.
6. Bu vaqt davomida sousni tayyorlashga kirishing. Buning uchun: suv va shakarni shakar butunlay erigunga qadar qaynating. Asal, vanilin, apelsin po'sti va limon sharbatini soling. Past olovda, 20 daqiqa davomida qaynating.
7. Belgilangan vaqt o'tib, tayyor baklavani sous bilan quying va butunlay sovutishga qoldiring.
Yoqimli ishtaxa!